Uviéu aprueba por unanimidá nel Plenu la redaición d’una ordenanza que regule l’usu del idioma

PP, FAC y PSOE apoyaron por unanimidá la iniciativa d’Izquierda Xunida d’Uviéu na que pidía que’l Consistoriu aceptara escritos n’asturianu. El Conceyu d’Uviéu va redautar una ordenanza municipal que regule l’usu del idioma del país.

Esta propuesta d’Izquierda Xunida (IX) vieno tres la denuncia pública fecha por Iniciativa pol Asturianu’l mes pasáu cuando’l so vocal de Voluntariáu, Xurde García Cilleros, nun pudo entregar un documentu nel Rexistru pola negativa d’un funcionariu de tramitalu al tar escritu n’asturianu. Una situación que los cuatros grupos municipales van tratar d’evitar que se repita otra vuelta cola redaición d’una ordenanza municipal que regule l’usu del idioma nel conceyu.

“Celebramos el consensu xeneráu alredor del asturianu, anque taremos sollertes al cumplimientu de lo aprobao nel Plenu d'esti vienres pasáu. Ha recordase que la situación del asturianu nel conceyu d'Uviéu ye de nula presencia per parte de l'alministración municipal. Uviéu ye unu de los conceyos asturianos onde menos pasos se dieron hasta agora, y qu'ente otres cuestiones, tien pendiente l'aprobación de la toponimia tradicional como oficial, como yá ficieron una gran mayoría de los conceyos asturianos, incluyendo cásique tolos más poblaos, como Xixón, Avilés, Llangréu, Mieres, Siero o Castrillón”, señalen dende Iniciativa pol Asturianu, qu’unvió una comunicación a tolos conceyales uviedinos felicitándolos pola so decisión y animándolos “a siguir dando más pasos a favor del asturianu”, asina como ufriéndose a asesor en cuestiones de normalización llingüística al equipu municipal y a la oposición.