Cúmplense 205 años de la proclamación de soberanía de la Xunta Xeneral d’Asturies

El 25 de mayu del 1808, la Xunta Xeneral proclamóse soberana rebelándose contra les tropes franceses de Napoleón qu’invadieren el país. Esti sábadu cúmplense, otra vuelta ensin nenguna conmemoración institucional, 205 años d’esa fecha.

La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

Los partíos y coleutivos soberanistes asturianos celebren esta fecha con un actu reivindicativu conxuntu n’Uviéu baxo la etiqueta #AsturiesResiste. Ésti va tener llugar mañana, a les 13 hores, frente a la Xunta Xeneral y cuenta col sofitu de Conceyu Abiertu, Darréu y Compromisu por Asturies. La federación de partíos asoleyó la tarde del miércoles un comunicáu nel que califiquen el 25 de mayu de símbolu de resistencia. “Salvando los distintos momentos históricos, constitúi un exemplu de rebeldía ante la inxusticia y un actu d’afirmación de la capacidá d’Asturies en ser dueña del so futuru”, afirmen dende Compromisu, que reclama la incorporación d’esta fecha al calendariu festivu por ser “ún de los fechos más importantes de la historia asturiana”. Nesi sen, llamenta que’l 25 de mayu nun tenga “nengún tipu de reconocencia institucional”.

Coincidiendo con esta efeméride, la Sociedá Cultural Xixonesa asoleyó una declaración na que reivindica “la esperiencia d'aquel procesu soberanista como un momentu constituyente de la historia d'Asturies como país, y tamién como un exemplu a recordar de la capacidá de les clases populares asturianes pa desbordar el marcu institucional establecíu al traviés de l'acción colectiva”. Nel testu recuerda que “nuna situación xeneral de desintegración política de la monarquía hispánica y d'invasión militar, la sociedá asturiana destacó pola fondura y la persistencia de l'afirmación política de la so personalidá coleutiva, reinventando unilateralmente la so propia tradición institucional pa dar rempuesta al desafíu que suponía l'amenaza de satelización al respective del Imperiu francés”, y da un papel importante a les clases populares a la hora de dar esi pasu.

El coleutivu compara lo que llamen “el mayu asturianu” cola coxuntura actual y considera qu’esta esperiencia histórica, “cola so particular combinación de tradición y modernidá, ye un recursu simbólicu de gran potencial. Porque frente al cuadonguismu folclóricu y alienante que la clase política posfranquista institucionalizó hai trenta años, el mayu asturianu ye una alternativa como discursu identitariu dende la reivindicación de la refundación democrática d'Asturies como comunidá política”. Como conclusión, y p’acabar cola situación actual, llama a la creación “d'una alternativa unitaria dende la esquierda, dende abaxo y dende Asturies; d'un Bloque Popular Asturianu que sirva de ferramienta estratéxica de ‘rotura democrática’ col réxime caciquil, clientelar y bipartidista d'esta II Restauración Borbónica”.

XVI Día d’Andecha

Andecha Astur celebra’l 25 de mayu cola inauguración del llocal nuevu de la formación nacionalista n’Uviéu, asitiáu na cai Paraísu, númberu 20. Esti recintu va acoyer les actividaes del XVI Día d’Andecha, xornada festiva que la organización entama tolos años pa conmemorar la declaración de soberanía de la Xunta Xeneral. Nesta ocasión, ésta va principiar con un actu políticu a les 14.30 hores, col envís de facilitar l’asistencia de los sos militantes y simpatizantes a la concentración convocada baxo la etiqueta #AsturiesResiste, y va continuar con una espicha dientro de la “llinia de sobriedá y de reencadarmamientu internu que ta llevando alantre Andecha Astur”.

Otra manera, coincidiendo con esta fecha histórica pal país, Asturies.com recupera un artículu d’Alicia Laspra Rodríguez na revista 'Asturies. Memoria encesa d'un país', de la Fundación Belenos, sobre les rellaciones d’Asturies y Inglaterra demientres la Guerra d’Independencia.