González Castro: “Quiximos que la xente de Portugal conociera nel FIMI la nuesa rica gastronomía”

Cangues d’Onís foi un de los trés conceyos asturianos presentes nel Festival Internacional Máscara Ibérica (FIMI) de Lisboa. El so alcalde, José Manuel González Castro, buscó atrayer al viaxeru portugués al traviés de la gastronomía.

-¿Cómo se xestó la presencia del Conceyu de Cangues d’Onís nel FIMI de Lisboa?

Foi tres un alcuentru que tuvimos na Casa Conceyu de Cangues d’Onís con persones d’equí, de Lisboa, que nos convidaron a venir pa ver un poco lo que ye’l Festival Internacional de la Máscara Ibérica. Ehí surdió la idea dende l’equipu de gobiernu y l’Ayuntamientu de nun venir a Lisboa namái a visitar lo que ye’l certame, sinón trayer una demostración gastronómica del conceyu, yá que contamos con una variedá rica de productos, col oxetivu d’abrinos al turismu y al viaxeru portugués. Esperamos qu’esto sía l’aniciu d’una rellación ente Lisboa y Cangues d’Onís p’abrir fronteres y pa que la xente de Portugal conoza la nuesa rica gastronomía y el conceyu, puerta natural a los Picos d’Europa, ricu tamién n’historia y naturaleza.

¿Por qué contaron pa esta iniciativa con Ramón Celorio?

Celorio ye un concineru de prestixu non sólo en Cangues, sinón tamién en toda Asturies y n’España, y pensamos que yera’l más afayadizu pa mostrar a los portugueses la nuesa rica gastronomía. La xente que participó na amuesa de cocina qu’él presentó disfrutó muncho. D’igual forma, hai que dicir que’l Conceyu de Cangues tamién entamó una preba del productu estrella de Cangues d’Onís y d’Onís, el Quesu Gamonéu, pa que la xente lu conoza.

Emponderaba'l cocineru cangués na so intervención al Conceyu pola so apuesta pol mercáu dominical de Cangues.

El mercáu ye otru aliciente más pal viaxeru y visitante, onde pueden atopar productos de la güerta, quesos y sidra, ente otros. Ye otra manera más de promocionar la nuesa rica gastronomía.

¿Ye importante tar presente nel festival qu'entama Progestur?

Sí, ye importante como promoción turística. El motor de la economía de Cangues d’Onís, xunto cola ganadería, ye’l turismu y nesti campu l’equipu de gobiernu, l’Ayuntamientu y la corporación tamos poniendo tol nuesu esfuerciu y trabayu. La verdá ye que per equí pasen miles y miles de persones y, precisamente, el viaxeru portugués ta mui al alza na nuesa zona, como amuesen les estadístiques de la Oficina de Turismu de Cangues d’Onís. Queremos que Portugal conoza Cangues d’Onís y Asturies.

¿La conexón áerea direuta con Lisboa ayuda a esta mayor presencia de turistes portugueses?

Claru. El qu’haya un vuelu de vienres y de domingu facilita que los asturianos vayamos a Portugal y que los portugueses vayan a conocer la nuesa tierra.

¿Va siguir Cangues d’Onís participando nel FIMI?

Esperemos que sí, que podamos repetir l’añu qu’entra. Tenemos un alcuerdu de collaboración con Lisboa y ye posible que preparemos dalgo n’agostu en Cangues. Queremos continuar con esta rellación col ayuntamientu lisboeta.

Na semeya, González Castro, acompañáu pola la primer teniente d'alcalde y conceyala de Cultura, María Fe Gómez Alonso, observa cómo Celorio trabaya con verdures de la güerta canguesa. Autor: Iván G. Fernández.