L’ALLA celebra’l sábadu n'Uviéu la prueba de conocencia d’asturianu

El xueves ye’l día caberu pa inscribise na prueba de conocencia d’asturianu de mayu de l’ALLA, que va tener llugar el sábadu n’Uviéu. D’igual forma, yá ta abierta la matrícula pa la Universidá Asturiana de Branu (UABRA) en Cangas del Narcea.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru– y que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

L’esame cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. Les persones interesaes en facer la prueba de conocencia tienen de plazu hasta’l xueves pa formalizar la matrícula nel horariu siguiente: de llunes a xueves, de 9 a 15 hores y de 16 a 19 hores. L’esame va celebrase’l sábadu, a les 9.30 hores, na Facultá de Formación del Profesoráu y Educación de la Universidá d’Uviéu (cai Aniceto Sela), asitiada nel campus de Llamaquique, en concreto nel edificiu sur.

La UABRA, del 29 de xunetu al 9 d’agostu

Dende güei, y hasta’l 30 de mayu, ta abierta la inscripción pa la UABRA, que cuenta cola collaboración de la Universidá d’Uviéu y el Conceyu de Cangas del Narcea, en cualesquier de los cursos qu’ufierta: ‘Cursu elemental de Llingua Asturiana’, ‘Cursu Avanzáu de Llingua Asturiana’ y el ‘Cursu de Gallego-asturiano (primeira fase)'. Éstos tienen un coste de 300 euros, cantidá qu’inclúi los materiales y la pensión completa na Escuela-Hogar de Cangas.

Amás, la UABRA tamién ufre dellos ‘Cursos d’Afondamientu Cultural y Llingüísticu’, que tienen 35 hores de duración. Asina, na selmana del 29 de xunetu al 3 d’agostu, van impartise ‘Capacitación pa la traducción al asturianu’, a cargu de Cristina Valdés Rodríguez; ‘Escuela y anovaciones n’Internet’, coordináu por David Melendi Palacio; y ‘Xuegos y tradiciones populares asturianes’, empobináu por Roberto González-Quevedo González. Mientres, del 5 al 9 d’agostu, van tener llugar ‘Xestión cultural n’Asturies: xestionando llingües y cultures’, con Isabel Hevia Artime como profesora; ‘El Navia-Eo: espacio, cultura y futuro’, que va impartir José Antonio Fernández Vior; y ‘Asturies y la so historia recién’, dirixíu por Rubén Vega García. Cáun d’estos cursos tien un preciu de 190 euros, tamién con pensión completa y materiales incluyíos.

L’horariu pa formalizar la matrícula na sede de l’ALLA (L’Águila 10, Uviéu) ye’l siguiente: de llunes a xueves, de 9 a 15 hores y de 16 a 19 hores; y de 9 a 14 hores, los vienres. Por mor de la demanda alta que tienen estos cursos, va siguise un orde rigurosu d’inscripción.