Asturies.com ufre una galería de semeyes del Festival Internacional Máscara Ibérica de Lisboa

Del 9 al 12 de mayu, Asturies tuvo una representación importante nel Festival Internacional Máscara Ibérica (FIMI) de Lisboa. Asturies.com ufre a los sos llectores una galería de semeyes que lleven la firma d’Iván G. Fernández.

Los Sidros y La Comedia de Valdesoto foron los representantes asturianos nel VIII Desfile de la Máscara Ibérica –eventu central del festival entamáu por Progestur– onde participaron 30 mazcaraes procedentes de dellos puntos de la Península Ibérica, cola novedá de la presencia d’una formación de Bulgaria, Survakari. En total, 500 persones caleyaron per Lisboa nuna procesión de color que tuvo 70.000 testigos nes cais de la capital portuguesa.

Gracies a les semeyes d’Iván G. Fernández, los nuesos llectores van poder viaxar a un certame capaz d’atrayer a 300.000 persones nos sos cuatros díes de duración, nel qu’Asturies tuvo una repercusión amplia.