El Rexistru del Conceyu d’Uviéu nun acepta un escritu por tar n’asturianu

Un funcionariu del Rexistru del Conceyu d’Uviéu refugó la entrega d’un documentu por tar n’asturianu y obligó a redactalu en castellanu. L’afeutáu foi Xurde García Cilleros, d’Iniciativa pol Asturianu, coleutivu que califica’l fechu de “llamentable”.

El vocal de Voluntariáu de la organización pretendía solicitar un espaciu públicu pa la celebración d’una actividá, pa lo que se dirixó al Conceyu d’Uviéu a entregar la documentación necesaria nel Rexistru. La sopresa vieno cuando’l funcionariu que lu atendió negóse a aceptar l’escritu por tar n’asturianu, obviando la Llei de Promoción y Usu del Asturianu/Bable, aprobada nel 1998, qu’establez el derechu de la ciudadanía a dirixise cola alministración nel idioma del país. Pese a la indignación lóxica de García Cilleros, el trabayador municipal afalólu a facelo en castellanu si quería tramitar el pidimientu.

“Dende Iniciativa pol Asturianu entendemos esti fechu como una grave discriminación inxustificable”, aseguren los responsables del coleutivu nun comunicáu, que tamién recuerden otres disposiciones llegales que reconocen el derechu de los ciudadanos a nun ser discriminaos pol usu de la llingua propia, como la Constitución o la Carta Europea de les Llingües Minoritaries, ésta última roblada pol Estáu. La reaición de la organización que trabaya pola normalización del idioma foi la presentación d’una quexa formal énte’l propiu Conceyu d’Uviéu y la Procuradoría Xeneral d’Asturies, “solicitando que nun vuelva a repitise un fechu como ésti, que xenera indefensión xurídica ente la ciudadanía qu'opta por espresase n'asturianu y que ye una verdadera marxinación social d’una parte de la sociedá asturiana”.

D’igual forma, reclama al ayuntamientu del conceyu uviedín, el segundu más pobláu d’Asturies y ún de los pocos qu’entá nun tien oficializada la so toponimia tradicional, que faiga por usar l’asturianu, más “cuando nun supón nengún gastu estra la rotulación billingües en cartelos y material informativu de campañes, fiestes y otres actividaes”. “L'Ayuntamientu d'Uviéu vive dafechu d'espaldes al usu del asturianu, siendo unu de los ayuntamientos asturianos con más medios y posibilidaes pa promocionar l'asturianu”, afirma Iniciativa, que pretende aconceyar con tolos grupos municipales pa tratar esti asuntu.