Cúmplense 30 años de la celebración de les primeres eleiciones democrátiques a la Xunta Xeneral

Esti miércoles cúmplense 30 años de la celebración de les primeres eleiciones democrátiques a la Xunta Xeneral. El socialista Pedro de Silva resultó ganador d’esta cita colas urnes na que l’asturianismu tuvo representáu pol Ensame.

Pa conmemorar esta efeméride, axuntáronse na Xunta Xeneral bona parte de los 228 diputaos que se sentaron na cámara nesti tiempu mientres nueve llexislatures, reunión que s’inmortalizó con una semeya na escalera del edificiu. Los ex presidentes Vicente Álvarez Areces y Francisco Álvarez-Cascos foron l’ausencia más notable de la celebración. Amás, nesta xornada inauguróse una esposición conmemorativa d’esti trenta aniversariu que se podrá visitar na Xunta Xeneral hasta’l 31 de mayu.

El 8 de mayu del 1983, el pueblu asturianu pudo votar per primer vegada al so presidente tres l’aprobación un añu enantes del Estatutu d’Autonomía. Estes eleiciones tuvieron una participación del 65,04 por cientu, con trunfu con mayoría absoluta pal PSOE de Pedro de Silva al sumar el 51,96 por cientu de los votos (26 escaños). Tamién algamaron representación la Coalición Popular, con 14 diputaos (30,23 por cientu), y el Partido Comunista de Asturias, con 5 (10,72 por cientu). La formación representante del asturianismu nesta cita coles urnes foi l’Ensame Nacionalista Astur (ENA), que sumó un total de 2.505 votos (0,44 por cientu).