La xunta estraordinaria de l’ALLA, actu protagonista del XXXIV Día de les Lletres Asturianes

Asturies vive esti vienres una celebración nueva del Día de les Lletres Asturianes. Per tol país celébrense actos coincidiendo con esta xornada, siendo’l más destacáu la xunta estraordinaria que celebra l’ALLA nel Teatru Campoamor.

El discursu institucional d’Ana María Cano, presidenta de la institución, va ser, como ye vezu, el momentu más esperáu d’una xunta que va servir p’acoyer a David Melendi Palacio como académicu. Esti doctor n’Inxeniería Informática y profesor del área d’Inxeniería Telemática de la Universidá d’Uviéu, onde vien desendolcando’l so llabor investigador, ye “ún de los principales promotores na anovación de la llingua asturiana nes nueves teunoloxíes”, señalen dende l’Academia de la Llingua Asturiana (ALLA).

Sonia Avellaneda y Próspero Morán van encargase de presentar esti actu, previstu pa les 20.30 hores, nel que l’entamu musical va correr a cargu del gaiteru Álvaro Cueto. Tres los discursos preceutivos, van lleese una esbilla de poemes y va actuar Toli Morilla. Pa zarrar la xornada, l’ALLA va celebrar la so tradicional espicha nel Llagar Herminio, en Cualloto.

Día del Llibru n’Asturianu

Coincidiendo con esta xornada, tamién tien llugar el Día del Llibru n’Asturianu, nel que llibreríes y comercios de tol país ufren un 10 por cientu de descuentu na compra de llibros y discos n’asturianu, amás d’un exemplar de ‘El ríu y la memoria’ de baldre, antoloxía poética de Nené Losada Rico editada por mor de la XXXIV Selmana de les Llestres Asturianes. Nesta ocasión, el llistáu d’establecimientos participantes ye’l siguiente: Aldebarán, Antares, Casa del Libro, Cervantes, El Corte Inglés, Diocesana, Garluc, Maribel, Ojanguren, Polledo, Puntos, Reconquista, San Pablo, Santa Teresa, II Milenio y Servitec (Uviéu); Bardos, Central, Cornión, El Corte Inglés, English Books Shop, Hernández, Paradiso, Roy y Tienda Mundo Sonoro (Xixón); Azucel, Casona, Clarín, El Corte Inglés, Víctor Núñez, La Vieja Atalaya y Tienda Elepé Productions (Avilés); Disco 55, La Pilarica y La Torre (Mieres); Treito (Cangas del Narcea); Imagen (Cangues d’Onís); Mario (Cancienes); Sol (L’Entregu); Rima (L’Infiestu); Clarín (Llanes); A. Pantiga (Ciañu); Arvín (Llaviana); Helas (Ḷḷuarca); Gestión (Les Arriondes); Muséu de la Sidra (Nava); Naredo y San Vicente(La Pola Siero); y FNAC (Paredes).

Otru llugar nel qu’atopar ‘El ríu y la memoria’ y el descuentu ye la Pescadería Antigua d’Avilés, onde se celebra dende ayeri la Feria del Llibru y Discu n’Asturianu. Ésta va tar abierta al públicu n’horariu de 11 a 14 hores, y de 17 a 21 hores, güei y mañana, mentes que’l domingu va tar de continuu de 11 a 19 hores. Nestos díes hai programaes delles presentaciones de llibros y actividaes nel recintu. Les persones interesaes pueden siguir tola actividá del certame al traviés de la cuenta en Twitter de l'Asociación de Llibreríes del Principáu d'Asturies.

Otres actividaes

Pa conmemorar el Día de les Lletres Asturianes, celébrense en tol país dellos actos culturales, na so mayor parte enfocáu a un públicu escolar y nel marcu de la materia de Llingua Asturiana y Gallego-asturiano. Asina, dientro del programa oficial, el Colexu Públicu San Miguel de Trevías va acoyer esti meudía una actividá escolar nel que van entregase los gallardones del XVIII Certame Artísticu Lliterariu, del X Certame de Cartelismu y del II Certame de Creación Audiovisual.

Más pal occidente, la Oficina de Coordinación Cultural y Llingüística d’Ozcos-Eo y del Parque Histórico del Navia conmemoren el Día das Letras Asturianas con un repartu de baldre d’obres escrites en gallego-asturiano. El llistáu de llugares onde poder facese con un exemplar ta disponible nel Facebook de la ‘Macomunidad Oscos Eo’. Amás, a les 20 hores, va presentase na Casa de Cultura d’A Veiga el llibru ‘Tradición oral en Ozcos-Eo’, actu al que va siguir un recital poéticu nel que participen Belén Rico Prieto, Alberto Calvín Corredoria y José Ramón Martínez Castro.

Mentes, na fastera centrar, en Xixón, Humberto Gonzali va protagonizar un actu poéticu, con acompañamientu musical de Dani García de la Cuesta, actividá entamada polos coleutivos Encadenados y Versos Libres que va presentar Aurora García Rivas (20 hores, Centru de Cultura Antiguu Institutu). Otra manera, nel Teatru Llar de Corvera, Carlos Alba ‘Cellero’ va representar ‘Llázaro de Tormes’, actividá de baldre que va principiar a les 22.30 hores.