Bloque por Asturies denuncia que'l serviciu de normalización llingüística de Llaviana lleva dellos díes peslláu

El voceru del Bloque por Asturies, Pablo Fernández, manifestó que'l serviciu de normalización llingüística del Ayuntamientu de Llaviana lleva dellos díes peslláu y calcó na situación de desemplegu de la so trabayadora. L'agrupación exixe la correición darréu de la situación y anuncia midíes ante la Comisión de Conflictos

   "Tenemos constancia de que l'Ayuntamientu fizo tolos deberes pa qu'esti serviciu tuviere continuidá", espresó Fernández, y resonsabilizó "única y esclusivamente" a la Conseyería de Cultura y a la Direición de Política Llingüística.

   Pal Bloque por Asturies esti tipu de situaciones danse pola "incompetencia" de los miembros del equipu de Gobiernu. "Quéda-yos grande'l puestu al nun dar continuidá a esti serviciu", declaró'l so voceru y exixó la correición darréu de la situación.

 
    "Si faen casu omisu a los nuesos pidimientos vamos llevar esti tema ante la Comisión de Conflictos establecida dientro del acuerdu de Gobiernu", señaló'l voceru del Bloque, y recalcó que necesita una confirmación darréu porque se trata d'un incumplimientu y una mala xestión.

   "Enantes se renovaben les sovenciones sin nengún problema y agora vamos hacia atrás", espunxo Pablo Fernández, voceru del Bloque por Asturies, que recalcó que tanto la Conseyería como la direición de Política Llingüística s'asitien al marxe de lo pautao nel acuerdu de Gobiernu.