Un añu de prisión pa los dos vecinos de La Pola Ḷḷena acusaos de participar nes protestes mineres

Los dos ḷḷenizos acusaos de participar nuna protesta minera que terminó cola Guardia Civil dientro del cascu urbanu de La Pola Ḷḷena en xunetu alcordaron cola Fiscalía una condena d’un añu de prisión. De primeres, pidíen-yos trés años y mediu.

D’esta forma, al nun tener antecedentes penales, los dos vecinos de La Pola Ḷḷena, un hosteleru y un carpinteru que sofitaben les protestes mineres que vivía Asturies mientres el branu pasáu, evitarán cumplir condena de cárcel. Estes dos persones foron identificaes poles fuercies policiales por llanzar “botelles de cristal y piedres” a los axentes de seguridá na nueche del 10 de xunetu depués de que la Guardia Civil entrara nel cascu urbanu tres quitar una barricada na autopista, provocando momentos de peligru y tensión.

Díes enantes, una aición asemeyada causó firíes na cara a una neña y a una muyer. Una pelota de goma llanzada por un antidisturbiu frayó un cristal d’una vivienda, polo que la pequeña tuvo que ser treslladada a un hospital. Un teniente de la Guardia Civil, xefe de los antidisturbios esa nueche, señaló énte'l xuez en marzu que la pelota llanzóse dende “el bandu subversivu” y non por nengún de los sos efeutivos.