L’árbitru y el Racing ganen al Sporting

|

Un penalti claru a favor del Sporting non señaláu y un gol llegal anuláu foi’l balance d’una actuación arbitral qu’inclinó’l partíu pal Racing, un equipu qu’amosó una gran efectividá por mor que les dos úniques veces que llegaron claramente a la portería asturiana tresformáronse en goles. Esta derrota pon al Sporting nuna situación complicada, a namás tres puntos del descensu.

L’Sporting salió a el Molinón con dos baxes importantes, les de Barral y Carmelo, titulares habituales nos últimos partíos. Sicasí, los asturianos fixeron una bona primera parte, na que dominaron el xuegu y llevaron peligru a la portería visitante, como  na ocasión que tuvo Bilic nel minutu 9 al rematar un balón al llargueru. L’Sporting acosaba y el Racing, agazapáu, limitábase a intentar salir a contragolpe, anque fracasaba nos últimos metros. Con empate a cero, vendría la primera de les xugaes polémiques. Nel minutu 43 el defensa racinguista Pinillos fai unes manes clares nel área, que l’árbitru andaluz Ramírez Domínguez nun vio o nun quiso ver.

Na segunda parte los xixoneses siguieron buscando’l partíu, pero diba ser el Racing el que marcase na primera llegada clara al área xixonesa, cuando nel minutu 53 Zigic remató nel área pequeña un centru rasu de Luis Fernández. A partir d’ehí’l partíu complicóse pa los asturianos, que siguieron buscando’l gol hasta que llegó gracies a un remate de Kike Mateo nel área pequeña. Sicasí, l’arbitru anulólu por un fuera de xuegu. El xugador sportinguista nun taba n’orsai. Segundu errror arbitral grave. Colsa, a dos minutos del final, marcaría’l segundu y definitivu gol de los santanderinos.

Una derrota que complica la vida de los asturianos, a la espera de la visita del Valencia de David Villa la próxima xornada.

Hai que conseñar, lo mesmo que pasó cola visita del Real Madrid, el llamentable espectáculu que dio’l sector mas radical d’aficionaos del Racing, tanto dientro como fuera del estadiu. El llanzamientu d’oxetos al terrenu de xuegu o los insultos y amenaces a la grada xixonesa fueron práctica habitual d’estos “aficionaos” al futbol.

Ficha técnica
 
Sporting de Xixón 0- Racing de Santander 2

Sporting de Xixón: Lafuente, Sastre, Iván Hernández, Neru, José Ángel, Michel (Diego Camacho m 75), Matabuena (Pedro m 81), Luis Morán (Maldonado m 75), Kike Mateo, Diego Castro y Bilic.

Racing de Santander: Toño, Pinillos, Moratón, Garay, Luis Fernández, Sepsi, Munitis (Luisma, 93), Luccin, Lacén, Pereira (Colsa m 78) y Zigic (Tchité m 86).

Goles: 0-1, m.53: Zigic. 0-2, m.88: Colsa.

Árbitru: Ramirez Domínguez (andaluz). Sacó tarxetes amarielles a Munitis (m 34), Garay (m 43), Moratón (m 47), Sepsi (m 57) y a Matabuena (m 79).

Comentarios

Esti equipu lleva tola temporada igual, o encarrila'l partíu bien dende l'entamu o como les coses vayan torcíes fúndense-y los plomos. Lo de los árbitros ye dalgo colo qu'hai que cuntar, val más nun dai vueltes.
Al equipu de toes maneres vilu firme y bien físicamente, nun me paez d'esos conxuntos que van en cayida llibre, nin muncho menos, pero fáennos falta varies ocasiones pa materializar y el Racing la primera que tuvo Zigic, pa dientro.
Y sobre los radicales del Racing, norabuena, nel top ten de les aficiones paletes yá tan al altor de la del Madrí.

Contador Estadistiques