L’Atenéu N’Alfoz y Compromisu critiquen la decisión del Niemeyer pa col Conciertu pola Oficialidá

La negativa del Centru Niemeyer a acoyer el Conciertu pola Oficialidá d’esti añu provocó les crítiques de l’Atenéu n’Alfoz y de Compromisu por Asturies. Dambos coleutivos nun entienden esti actu discriminatoriu nuevu pa col nuesu idioma.

La entidá cívica qu’axunta a asturianistes d’Avilés, Castrillón, Corvera y Illas esixe a los responsables del Centru Niemeyer “respetu pola cultura asturiana”. “L’Atenéu N’Alfoz atopa nesta decisión una amuesa más de la actitú d’autoodiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”,  señala  nun comunicáu nel que reafita’l compromisu del coleutivu pola oficialidá y nel qu’amuesa la so solidaridá cola Xunta pola Defensa de la Llingua Asturiana (XDLA), organización qu’entama’l Conciertu pola Oficialidá xunto con Xunta Moza.

Pela so parte, la federación de partíos Compromisu por Asturies fala de “una discriminación nueva de la llingua asturiana”, más sangrante entá “al venir d’una entidá de financiamientu públicu”, con un costu de 40 millones d’euros, que se vende “como un espaciu pa la cultura” cuando, al mesmu tiempu, “refuga la presencia de la llingua asturiana nel so espaciu”. Pa Yolanda Huergo, vocera de la organización, negar el centru avilesín a la XDLA ye “la guinda del pastel, la culminación d’un proyeutu cultural qu’aveza a traenos dende la so nacencia noticies de sobrecoste, presupuestos inflaos y dineros perdíos de forma misteriosa; too ello paez que cola conocencia y permisividá del Gobiernu del PSOE, siempres más esmolecíu polo megalómanu que polo asturiano, y por conxurar les sos pantasmes y obsesiones en rellación cola cultura asturiana”.

Los nacionalistes ven nesta decisión “un exemplu nidiu de censura ideolóxica que s’axunta al nomáu paletismu la FSA, incapaces de valorar lo más cercano, inclinándose siempre por cualquier cosa que venga de fuera primero que polo fecho, falao o pensao n’Asturies”, lo que constitúi “otra amuesa del autoodiu qu’esiste ente los políticos asturianos”. Por último, reclamen la oficialidá de la llingua asturiana p’acabar “cola dicriminación de les y los asturianos pol fechu de selo y falar el so idioma”.