El Ministeriu d'Educación confirma la responsabilidá del Gobiernu pa cola materia de Llingua Asturiana

Iniciativa recibió una carta del gabinete del ministru Wert que confirma que la responsabilidá de la presencia de la materia de Llingua Asturiana na Educación depende del Gobiernu asturianu. Ana González descartó avances nel so status.

Nel mes de febreru, Inaciu Galán, presidente d’Iniciativa pol Asturianu, desplazóse a Madrid col oxetu d’aconceyar con diputaos asturianos nel Congresu, viaxe qu’aprovechó pa entregar cartes nos ministerios d’Educación y Fomentu dirixíos a José Ignacio Wert y Ana Pastor, de manera respeutiva. Nel casu concretu de Cultura, la organización que trabaya pa la normalización del idioma treslladaba al ministru la dulda sobre “la situación na quedaría la llingua asturiana d’aprobase la nueva reforma educativa, solicitando una solución que permita que l’asignatura tea, polo menos, nes mesmes condiciones nes que ta agora, que yá son bastantes males –como yá espresó la vocalía d’Enseñu de la organización en numberoses ocasiones–, asina como la reconocencia de la especialidá d'asturianu pal profesoráu”.

Selmanes depués, conocíase’l conteníu del tercer anteproyeutu de la Llei Orgánica pa la Meyora de la Calidá Educativa (LOMCE), que recoyía la situación del asturianu al tener en cuenta les llingües non oficiales con reconocimientu xurídicu y presencia na educación. Nesi momentu, el Sindicatu Unitariu y Autónomu de Trabayadores de la Enseñanza d’Asturies (SUATEA) adelantaba que la responsabilidá d’establecer el status de l’asignatura de Llingua Asturiana y Gallego-asturiana yera del Gobiernu asturianu, dalgo que’l Ministeriu d’Educación, Cultural y Deporte confirma agora nesta carta de respuesta a Iniciativa pol Asturianu.

Nun comunicáu, esti coleutivu torna a recordar al Executivu “la necesidá de siguir avanzando na presencia del asturianu nes escueles ya institutos. La solución ideal vendría cola oficialidá del asturianu y cola correspondiente normativa, pero, mientres, ye necesario avanzar y que s’introduza l’asturianu como llingua vehicular nes escueles,  pelo menos en dalgunes asignatures, asina como facer de la materia d’asturianu, una asignatura xeneral, normal, que compartan tolos alumnos asturianos, y non una materia que vive n’absoluta precariedá, como hasta agora”. Queden por conocer les intenciones reales del Gobiernu pa cola asignatura, pero la intención de la conseyera d’Educación, Cultura y Deporte, Ana González, ye dexala “polo menos como taba hasta agora”, según confirmó nun conceyu con representantes Asamblea de Maestros de Llingua Asturiana y Gallego-asturiana, lo que nun da pie a pensar en pasos alantre na situación de la materia nel sistema educativu.

Presencia del idioma na web ministerial
La carta del gabinete del ministru Wert tamién faise ecu de la demanda d’Iniciativa del Asturianu d’incorporar a la web del ministeriu la llingua asturiana xunto col inglés y el restu de llingües oficiales. Nesi sen, afirmen que treslladaron la solicitú a la Subsecretaría. “Pa Iniciativa pol Asturianu ye importante esti tipu de presencia del idioma, que supón da-y cierta normalidá na alministración, yá qu’agora la llingua asturiana ta marxinada con respectu al restu de llingües del estáu”, señala’l coleutivu.