Dixebra y Los Berrones van animar les semifinales de FestiAMAS

L’Anuario de la Música Asturiana (AMAS) anunció la puesta marcha d’un concursu pa grupos asturianos de tolos estilos, de nome FestiAMAS. Ésti va dividise en cuatro semifinales, nes que tamién van actuar Dixebra y Los Berrones.

Los dos grupos referencias de la escena rock en llingua asturiana, que cuente dambos col Premiu AMAS de Honor, repartiránse estes cuatro cites; esto ye, caún actuará en dos de les semifinales previstes. La primer d’elles tendrá llugar en Tresona’l 30 d’abril y la segunda’l 11 de mayu nel parque de Los Nogales, en Cangas del Narcea, conciertos nos que van actuar Los Berrones. Pela so parte, Dixebra va llevar el so direuto’l 1 de xunu a La Bombilla, en Llanes, y el 15 d’esi mesmu mes al mercáu del ganáu de La Pola Siero, nes otres dos semifinales. La fecha de la gran final tovía nun se zarró.

L’oxetivu de FestiAMAS ye impulsar la música fecha n’Asturies y nél tienen cabida bandes del país de cualquier estilu, tengan o non trabayos discográficos editaos. La organización va dividir a los candidatos por fasteres, seleicionando pa les semifinales a cuatro del occidente y del oriente, y a ocho del centru. Un xuráu decidirá en caúna d’elles cuál de los grupos ye merecedor de disputar la gran final del concursu y llevase’l premiu final, consistente nuna contratación na so zona con un caché de 2.000 euros. Les bandes interesaes en participar han d’unviar los datos de la so formación, una semeya n’alta resolución y un mp3 propiu a la direición de corréu electrónicu amas@premiosamas.com enantes del 20 d’abril.