Xixón acueye esti vienres un homenaxe a Pachín de Melás nel 75 aniversariu de la so muerte

En marzu del 1938 morría na cárcel d’El Coto l'escritor Pachín de Melás. 75 años depués, Iniciativa pol Asturianu y Ástura entamen un homenaxe a la so figura énte l'ausencia d'un actu d'alcordanza impulsáu dende les instituciones asturianes.

L’actu va tener llugar esti vienres nel Atenéu Obreru de Xixón (cai Cuadonga, 7-Primeru izquierda) a les 20 hores y nél va tar presente la fía viva última d’Emilio Robles ‘Pachín de Melás’ y dellos miembros de la so familia, asina como escritores y delles personalidaes de la sociedá asturiana. Inaciu Galán va encargase de la so presentación.

Los coleutivos Iniciativa pol Asturianu y Ástura pretenden con esta actividá facer alcordanza de la figura de Pachín de Melás, “yá que les entidaes públiques nun faen un res pola so memoria nestos díes". "Creemos que ye un personaxe que nun puede ser escaecíu pola so importante aportación a a la lliteratura y a la llingua y cultura asturianes", afirmen los organizadores del actu, que conviden a tola ciudadanía a asistir al actu y, si-yos presta, lleer como homenaxe a Pachín de Melás un testu o poema del autor.