El xuez José Castro imputa a la infanta Cristina pol 'Casu Nóos'

La infanta Cristina foi citada a declarar pol xuez José Castro’l 27 d’abril a les 10 hores pola so participación supuesta na trama del 'Casu Nóos'. La imputación produzse una selmana depués de que Diego Torres aportara correos nuevos al maxistráu.

Na documentación presentada pol ex socio d’Iñaki Urdangarin, el xenru del rei Juan Carlos consultaba a la so muyer delles xestiones que quería facer mientres taba al frente del Instituto Nóos. Estos correos electrónicos son motivu suficiente pal xuez pa imputar a la infanta pese a que la Fiscalía nun vía necesario llamar a declarar a Cristina al entender que nun tea acreditao que participara na xestión de la entidá.

Esta noticia supón un revés nuevu pa la Casa Real española, que prefier nun facer comentarios sobre decisiones xudiciales, según afirmó un voceru de la institución. Nos años últimos son munchos los escándalos que rodeen a la Zarzuela, l’últimu’l papel xugáu pola empresaria alemana Corinna zu Sayn-Wittgenstein nel Estáu y la so rellación col rei Juan Carlos.