Les III Xornaes de la Sidra d’Escoyeta van celebrase ente’l 15 y el 21 d’abril nun centenar de chigres

Alredor de cien chigres van ufrir una cazuela y una botella de sidra d’escoyeta pol preciu de 3 euros ente’l 15 y el 21 d’esti mes. La primer mesa de preba d’esta sidra fecha con venti variedaes de mazana autóctona celébrase esti miércoles.

La xixonesa sidrería Principado, asitiada na cai Lluanco, acueye a les 18.30 hores esta mesa onde dellos espertos independientes van evaluar la sidra presentada polos cuatro llagares que conformen anguaño l’asociación que produz esti tipu de sidra, esto ye, Trabanco, Peñón, Foncueva y Muñiz. Namái les sidres qu’algamen la calificación de notable podrán salir al mercáu cola contra-etiqueta de calidá ‘Sidra de Manzana Seleccionada’. Per cuarto añu consecutivu, los llagareros adelanten la fecha d’esti eventu cola fin de corchar la nomada primer sidra del añu, o lo que ye lo mesmo, la sidra qu’entá nun foi trasegada.

La bébora de los toneles que superen esti esame van protagonizar, ente’l 15 y el 21 d’abril, les III Xornaes de la Sidra d’Escoyeta, nes que cerca de cien chigres de tol país van ufrir a los sos veceros la posibilidá de prebar esta sidra acompañada d’una cazuela gastronómica a un preciu únicu de 3 euros.

La DOP, de promoción en Madrid

La otra variedá de sidra que se fai nel país namái con variedaes de mazana autóctona, la de Denominación d’Orixe Protexíu (DOP), va tar presente nel XXVII Salón Gourmets de Madrid el martes. El crítico gastronómicu Carlos Delgado va ser l’encargáu de dar a conocer les propiedaes d’esta bébora en dos actos nos que va tar acompañáu por Eloy Cortina y Reyes Ceñal, presidente y xerente, de manera respeutiva, del Conseyu Regulador DOP Sidra d’Asturies.