Santianes: “Queremos que l’oyente cree la so propia historia inspiráu poles melodíes de ‘Brehinks’"

La gaita asturiana viaxa per llugares nuevos nel discu ‘Brehinks’ d’Iñaki Santianes (Uviéu, 1982). El gaiteru presenta un trabayu nel que la so maestría col instrumentu fusiónase col universu musical del compositor Gonzalo Díaz Yerro.

¿Cómo definiría’l discu ‘Brehinks’?

‘Brehinks’ ye un discu diferente col que buscamos introducir el soníu de la gaita dientro d’una concepción de la música más universal. Creemos que ye un discu arriesgáu y que ye necesario sentilu delles vegaes pa entendelu.

¿En qué se diferencia del so primer trabayu, ‘Foncalada’?

Creo que hai munches diferencies, yá que’l mio primer trabayu basábase en gran parte en melodíes tradicionales y aquelles que nun lo yeren taben arreglaes al estilu del folk más tradicional. Quiciabes ‘Engarradiella’ sía’l tema que xune estos dos trabayos, non tanto pola so sonoridá, sinón pola intención que buscábamos de sacar la gaita del so estatus convencional, al que tamos avezaos. Amás, naquel trabayu acompañáronme dellos músicos y nesti discu la mio compañía foi la música creada por Gonzalo Díaz.

Ente los dos discos pasaron 8 años. ¿Cómo evolucionó vusté nesti tiempu?

La mio evolución nestos años foi importante, yá que tuvi tiempu pa trabayar y conocer xente mui interesante que m’abrió la mente. Nesti tiempu finé la carrera de fagó; trabayé de profesor de gaita nel Conservatoriu, tamién de profesor de música; compartí escenariu con músicos de la talla de Luz Casal... Hubo munches y mui bones esperiencies que me sirvieron pa meyorar como músicu. 

‘Brehinks’ ye un álbum de gaita asturiana que se xestó a miles de quilómetros d’equí.

Coincidí col compositor Gonzalo Díaz Yerro na boda del mio hermanu en Bulgaria y ellí surdieron numberosos proyeutos que s’afitaron de manera definitiva nesti discu. Depués de munches hores d’avión y de non poques hores d’espera n’aeropuertos, nacieron bones idees que depués d’un tiempo consiguimos desendolcar.

¿Cómo s’organizaba pa trabayar con Gonzalo Díaz Yerro?

El trabayu fixímoslu al traviés d’Internet, yá que Gonzalo reside en Las Palmas de Gran Canaria. Los audios viaxaron pela rede al traviés de la plataforma Dropbox, d’un llau a otru del país per casi dos años. Poco a poco fuimos construyendo caún de los temes que yo grababa n’Asturies sobre les bases qu’él m’unviaba y que llueu facia-y llegar pel mesmu mediu.

El resultáu final ye un discu orixinal y mui distintu a los que se suel grabar con gaita n’Asturies.

Creímos necesario apostar por un proyeutu diferente yá que somos conscientes de qu’en tiempos de crisis hai que presentar idees nueves. Dende’l primer momentu tuvimos nidio que nun queríemos un discu al estilu tradicional, sinón ún nel que se fusionasen la esperiencia de Gonzalo dientro de la música cinematográfica colos mios conocimientos sobre la gaita asturiana.

¿Qué tipu de melodíes pue atopar el públicu en ‘Brehinks?

Melodíes mui diferentes, dalgunes inspiraes en música ambiental o que bien podíen servir de banda sonora a una película. Tamién podemos atopar  melodíes con ritmos llatinos, funky o discu.

¿Ta contentu col recibimientu que ta teniendo esti trabayu?

Tamos mui contentos cola acoyida que ta viviendo’l discu y cola respuesta por parte del públicu.

¿Por qué’l nome ‘Brehinks’ pal discu?

Buscamos un nome con personalidá y que’l públicu nun asociara a nada conocío pa da-y un carauter diferenciador a esti trabayu.

¿Irkham, Arnbeth o Krangh son llugares inventaos?

Tolos llugares y nomes que se citen en caún de los temes son inventaos. La nuesa intención ye que l’oyente cree la so propia historia inspiráu poles melodíes que siente.

Del so trabayu tamién destaca’l llibretu, qu’incorpora una frase a cada cantar.

Como dicía, pretendemos encamentar al oyente pa que cree la so propia historia inspirándose poles melodíes, pero tamién guiaos polos testos del llibretu. El so diseñu ye obra del artista Esteban Suárez. Tanto’l formatu como les ilustraciones definen mui bien l’oxetivu que nos marcamos con esti trabayu, que nun foi otro que’l d’aportar dalgo diferente a la música de gaita.

El xueves, día 4, presenta esti discu con un conciertu en Tierra Astur Águila. ¿Cómo va treslladar estos cantares al direuto?

Voi acompañame del músicu Andrés Alonso, que colos teclaos y les programaciones va ayudame a treslladar al públicu asistente a un mundu paralelu.

¿Tien dalguna otra actuación próxima prevista?

De momento tenemos confirmada una actuación en La Antigua Estación, n’ Uviéu, el 12 de Abril. Tamos intentado zarrar dalguna otra cosa más.

¿Y dalgún otru proyeutu en mente?

El que me conoza sabe que yo siempre tengo cientos de proyeutos na tiesta, pero que nun me presta desvelalos hasta que tean práuticamente materializaos.

Otra manera, vusté ta al frente dende hai dos años de la delegación asturiana nel Festival Interceltique de Lorient. ¿Cómo va la preparación de la edición del 2013, que va tar dedicada a Asturies?

Esti añu va a ser mui especial y, polo tanto, la preparación tamién ta siendo más costosa que n’otres ediciones. Creo que va ser un programa mui interesante. Desvelarémoslu’l 11 de Abril en Lorient, onde la delegación asturiana va facer disfrutar a tolos asistentes.