Amnistía Internacional pide al Gobiernu que los Derechos Humanos tean presentes nel viaxe per América

Una delegación asturiana encabezada pol presidente Javier Fernández ta de visita per América pa establecer rellaciones comerciales. Amnistía Internacional solicitó al Gobiernu que nun escaeza los Derechos Humanos nel so viaxe.

Colombia foi’l primer de los trés países que Fernández, acompañáu por Graciano Torre, conseyeru d’Economía y Emplegu, y de representantes de 33 empreses asturianes, va visitar nos díes próximos. En Bogotá, el presidente del país aconceyó con ellos pa tratar sobre les sos espectatives de negociu en Colombia. Asina, destacó el “esfueciu tan grande que les empreses asturianes tán faciendo” na so internacionalización, pero cree que “hai que reforzalo y pa ello tamos equí”. L’axenda prevista pa güei inclúi una entrevista col ministru de Vivienda, Germán Vargas Lleras, y cola ministra de Tresporte, Cecília Álvarez Correa Glen. Yá mañana, Fernández aconceyará col presidente Juan Manuel Santos Calderón y cola viceministra xeneral de Teunoloxíes de la Información y les Comunicaciones, María Carolina Hoyos Turbay. Amás, los empresarios van tomar parte nel I Alcuentru Empresarial Colombia-Principáu d’Asturies: Oportunidaes de Negociu, nel que van mantener alcuentros de nivel alto con entidaes y empreses colombianes.

Aprovechando esta visita institucional-comercial per América –tres Colombia, la delegación asturiana va viaxar a Panamá y México–, Amnistía Internacional treslladó al Gobiernu un informe que contién los sos esmolecimientos y recomendaciones en materia de Derechos Humanos nestos estaos pa que Fernández los tenga en cuenta nes sos entrevistes con cargos altos. El documentu, basáu nel Informe 2012 de Amnistía Internacional, apunta que’en Colombia, “el llargu conflictu armáu internu sigue afeutando sobre manera a los Derechos Humanos de la población civil, de forma especial a la de los pueblos indíxenes, les comunidaes campesins y afrodescendientes, los y les defensores de los Derechos Humanos, los dirixentes comunitarios y los sindicalistes”, ensin escaecer los homicidios “de los que lluchen pola restitución de les tierres”. Amás, recuerda-y que l’Axencia Asturiana de Cooperación al Desarrollu tien en marcha dende va tiempu un programa destináu a l’atención de víctimes de violaciones de los Derechos Humanos en Colombia.

Nel casu de México, alerta de los secuestros y muertes a cargu de los cárteles de la droga y d’otres bandes delicives, en munches vegaes cola vista gorda de la Policía o de funcionarios públicos, de la situación de les persones que traten de pasar la frontera hacia los Estaos Xuníos o de les violaciones de Derechos Humanos que cometen les Fuercies Armaes y la Policía. No que respeuta a Panamá, la ONG ta esmolecía polos proyeutos de grandes infraestructuras en tierres indíxenes y poles restricciones a la llibertá d’espresión por parte del Gobiernu.

Na semeya, Fernández saluda a Abel Rionda, d’ADN Mobile Solution, en presencia de Torre na reunión colos empresarios asturianos a la llegada a Bogotá.