La banda de punk-folk Skontra ufre dos actuaciones esta fin de selmana

Xixón y Llanes van acoyer dos conciertos de Skontra esta fin de selmana. El vienres, la banda de punk-folk actúa na xixonesa OTTO colos italianos Talco, y el sábadu, con Adizión Etílika. Mentes, Fernando Valle Roso visita Villaviciosa.

Con estes dos feches, Skontra da aniciu a una serie de conciertos que va llevar a la banda a Catalunya, Lleón o La Rioja nos meses próximos. El primeru de la llista ye’l d’esta nueche na discoteca OTTO, cita na que s’espera un enllenu, con entraes anticipaes escosaes en Xixón y Uviéu, lo que va llevar a muncha xente a mercar el ticket na puerta. Xunto a la banda de Xixón van actuar los tamién llocales Zigua y la banda italiana de ska-patchanka Talco, que yá tien a la ciudá como parada fixa en toles sos xires. El preciu del conciertu ye de 13 euros y el so comienzu ta previstu pa les 21 hores.

Mañana, los ḷḷenizos Adizión Etílika van ser los compañeros de Skontra sobre l’escenariu del Jägerhaus, en Llanes, nun conciertu en beneficiu del Vidiagu Rock. Ésti va principiar a les 23 hores y cola entrada, a un preciu de 3 euros, convídase a un tragu de Jägermeister. Pa esta cita tamién se prevé un bon ambiente, yá que dende La Pola Ḷḷena sal un autocar hacia l’oriente del país que va facer paraes en La Felguera y Xixón.

‘Camín d’ayures’

Fernando Valle Roso va actuar esta tarde, a partir de les 20 hores, nel Teatro Riera de Villaviciosa dientro de la so xira de presentación del so primer discu en solitariu, ‘Camín d’Ayures’. El cantante llangreanu va tar acompañáu por Xaime Arias (pianu), Michael Lee Wolfe (guitarra), Pablo Carrera (gaita) y Silvia Moreno, Carla Antuña y Carla Isidoro (coros). El preciu de la entrada ye de 5 euros.