Grupos ambientales critiquen la sanción baxa del Gobiernu a HCEnergía pol arramáu d’Aboño

800.000 euros de multa y 15.484 euros d’indemnización. Ésta ye la sanción que Mediu Ambiente propón pa HCEnergía pol arramáu d’Aboño, una cantidá que los grupos ambientales qu'exercen l'acusación popular consideren baxa.

“Resúltanos insuficiente en comparanza cola gravedá del dañu fechu al patrimoniu natural”, afirmen estos coleutivos, que creen que l’Alministración amuesa con conductes como ésta que ta dispuesta a que “fechos como’l denunciáu sigan cometiéndose”. “La multa qu’al final se-y imponga nun supón si non un coste adicional mínimu que pue solventar con una xuba de tarifes a los consumidores mientres a les nuestres costes siguirán llegando per años y, con frecuencia, los tóxicos vertíos al mar pola mercantil”, añaden.

La Coordinadora Ecoloxista d’Asturies, l’Asociación para la Defensa Jurídica del Medio Ambiente-ULEX, el Colectivo Ecologista de Avilés, la Plataforma por la Defensa de la Cordillera Cantábrica, l’Asociación para la Conservación y Estudio del Lobo (ASCEL), el Grupu d’Ornitoloxia Mavea d'Avilés, Ixuxu y l’Asociación Verdes Asturianos, grupos ambientales qu’exercen l’acusación popular nesti casu nel que la xueza continúa coles investigaciones, recuerden que namái pudieron acceder al espediente sancionador de la Conseyería de Fomentu, Ordenación del Territoriu y Mediu Ambiente na causa penal, tres la negativa del Gobiernu a ufrila pela vía alministrativa. Esti documentu contién l’informe emitíu pola Direición Xeneral de Calidá Ambiental, “nel que se pon de manifiestu que l’arramáu del día 26 de xunetu del añu pasáu afeutó a más de 118.000 metros cuadraos de zones de bañu onde se necesitó prohibir el so uso pa tal fin, a 86.000 metros cuadraos de costes rocoses, escolleres y plataformes intermareales, y a más de 13.000 metros cuadraos de playa”, espliquen. Tamién rellata la cantidá alta d’asfaltenos nel fuel recoyíu na mar, “compuestos mui pesaos y persistentes, non biodegradables”, según afirma l’informe.

Pela so parte, la Demarcación de Costes declaró nun documentu que les manches detectaes nel mar yeren de fuel mui fluyíu, lo que nun permitía recoyelu, dalgo que fai suxerir a los ecoloxistes “que la toxicidá caltiénse n’estáu dispersu, afeutando a los recursos naturales y a la salú de les persones”. Tamién recuerden que l’arramáu llegó a amenazar la Reserva Natural Parcial de la Ría de Villaviciosa, asina como l’emisariu de la toma d’agua de mar del Acuariu de Xixón, qu’hubo de sellase. Unos fechos que consideren que son merecedores d’una sanción mayor y exemplarizante que la propuesta pol Gobiernu.