La XDLA llama a participar na concentración de los maestros d’asturianu del xueves n'Uviéu

La situación nueva na que s’atopa la materia de Llingua Asturiana nel tercer anteproyeutu de la LOMCE nun ye garantía pa la so presencia digna na educación, según la XDLA. El coleutivu llama a participar na concentración del xueves.

Esta modificación nel borrador de la nomada Llei Wert tien en cuenta la situación especial del asturianu, con reconocimientu xurídicu y presencia na educación, pero ensin el carauter de llingua oficial, quedando pendiente’l so encaxe nel sistema educativu “de lo que diga’l futuru decretu autonómicu que desenvuelva n’Asturies l’aspectu curricular de la llei”. “Garantíes, polo tanto, nenguna, porque nesti proyeutu de llei los derechos y les garantíes son pal castellanu y pa les llingues que se fixeron cooficiales nos sos territorios”, alerten dende la Xunta pola Defensa de la Llingua Asturiana (XDLA).

“Ensin entrar a valorar el recorte que tamién van carecer les llingues cooficiales si se llega a aprobar la llei tal como ta redautada nesti tercer borrador, tamos seguros de que’l sitiu de la Llingua Asturiana tenía que ser tamién el d’elles”, continúa’l coleutivu cívicu nun comunicáu, que considera que “el reconocimientu de la oficialidá del asturianu ye l’asignatura pendiente de los gobiernos d’Asturies llexislatura tres llexislatura”. “Polo que se ve, la conseyera actual, alliniándose cola actitú del so partíu contraria a la oficialidá, quier amestar el so nome a la llista de responsables públicos que pola so dexadez, inorancia, cobardía y falta d’altor políticu, dexaron ensin resolver la cuestión llingüística n’Asturies”, llamenta la XDLA.

Dáu l’escenariu que s’abre con esti cambiu nel borrador, l’asociación que trabaya na defensa del idioma considera que ye necesario tar al llau de los maestros y maestres de Llingua Asturiano y Gallego-asturiano que van concentrase’l xueves, a les 18.30 hores, na uviedina Escandalera “pa desixir que la reforma educativa nun precarice tovía más el nuestru idioma”. D’igual forma, la XDLA reclama “qu’esti cambéu llegal na normativa educativa del Estáu valga d’oportunidá p’ameyorar la situación de la Llingua Asturiana na enseñanza, aprovechando al máximo les posibilidaes d’esta llei nueva y de la Llei d’Usu y Promoción del asturianu. La normativa curricular autonómica que s’apruebe tien que garantizar que la ufierta del asturianu seya universal en tolos centros y tolos niveles educativos que regula la LOMCE –Infantil, Primaria, Secundaria obligatoria y enseñances secundaries postobligatories– en condiciones de llibertá d’elección y non d’optatividá compitiendo con otres asignatures como hasta agora; tien que valir pa desaniciar les práctiques discriminatories pa la Llingua Asturiana nos centros educativos de cualquier titularidá; y tien que prever la promoción real del asturianu nel sistema educativu, regulando tamién la posibilidá d’usalo como llingua vehicular p’aprender otres materies. Pa eso ye fundamental qu’haya un serviciu de normalización llingüística na Conseyería d’Educación, Cultura y Deporte”.

Na semeya, los profesores d’asturianu y militantes de Xunta Moza’l pasáu 31 de xineru frente al Rexistru Xeneral nun actu de protesta cola situación na queda la materia cola Llei Wert.