Día del Llibru Asturianu

Valledor sal de la disciplina de votu d'IU y podría dexar el so escañu na Xunta

|
  • Iglesias diz que la posición de Valledor tien "encaxe difícil" mentes que'l Bloque nun se pronuncia
  • El diputáu d'IU va tomar la decisión definitiva depués de Selmana Santa

El diputáu d'IU-BA-Verdes, Francisco Javier García Valledor, dixo güei que tanto él como'l so grupu parlamentariu y la organización política abren agora un periodu de tiempu d'unos díes pa decidir si continúa como diputáu o si abandona'l so acta de parlamentariu na Xunta Xeneral del Principáu d'Asturies.
En declaraciones a los periodistes, nos pasiellos de la Xunta, Valledor facía asina referencia a la situación que se vivió güei nel plenu, cuando nun emitió votu dalgún hacia una moción del PP sobre educación, a la escontra del criteriu del so grupu parlamentariu, que la refugó xunto al PSOE. La mesma, proponía la retirada del plan d'evaluación docente y la convocatoria de la mesa sectorial, demandes de los sindicatos d'enseñanza apoyaes polos populares y pol propiu diputáu d'IU. A lo último, el resultáu de la votación foi de 20 votos a la escontra (PSOE y IU-BA-Verdes) y 17 (PP) a favor, polo que la moción se refugó.
Valledor dixo sentise "disgustáu", porque'l so grupu parlamentariu "defraudó" les espectatives de la base social de la organización. Nesti sen, señaló que la iniciativa que güei presentaba'l PP ye una  "copia lliteral" d'una redactada por IU-BA-Verdes enantes de pactar colos socialistes la so entrada nel Gobiernu. Amás, detalló ante los periodistes iniciatives de la coalición que van nesi sen dende'l 2007.
Poro, el tovía diputáu d'IU-BA-Verdes, dixo que nun pudo votar a la escontra d'esta iniciativa y nin siquier intervenir nel plenu de güei "por coherencia" y porque amás nun quier contribuyir a aumentar el "descreitu" de la clase política. "Nun me siento cómodu y supongo que los mios compañeros tampoco se sienten cómodos", dixo Valledor, añadiendo qu'una formación política "debe ser coherente".
Valledor recordó que yá nel pasáu Conseyu Políticu d'IU d'Asturies yá punxo a disposición de la organización el so acta de diputáu. De magar agora, ábrense unos díes pa meditar si renuncia al so acta o non. En cualquier casu, aseguró que va siguir n'IU, anque yá nun tea como diputáu, si ye que se da la situación. "Nun voi dir pal grupu mistu", esclaró. Dexó entrever que la decisión definitiva podía llegar dempués de Selmana Santa.
IGLESIAS DIZ QUE TIEN "DIFÍCIL ENCAXE"
Pela so parte, el coordinador xeneral de IU d'Asturies, Jesús Iglesias, afirmó güei que "quien nun acata les decisiones" del grupu parlamentariu "tien difícil encaxe", en referencia a l'actitú de Valledor.
"La reflexón personal de Valledor y colectiva de la direición tien de ser cómo recuperar la cohesión del grupu parlamentariu", esplicó Iglesias. "Cómo garantizar que les decisiones que toma'l grupu s'acaten por tolos miembros del mesmu, y evidentemente quien nun tea dispuestu a aceptar dalgo tan elemental efeutivamente tien difícil encaxe", afirmó.
Consideró una "situación grave" la ocurrida güei nel parlamentu y almitió que nun pue "mirar pa otru llau como coordinador". "Nos mecanismos de funcionamientu de cualquier organización democrática y grupu parlamentariu les decisiones tómense por mayoría y son acataes pol que llexítimente ye contrariu a esta posición", señaló. "Nun cabe, nel exerciciu d'una autonomía personal mal entendida, frayar la disciplina de votu", sentenció.
Entrugáu por si l'actitú de Valledor diba merecer sanciones per parte del partíu, señaló que los estatutos d'IU prevén les posibles midíes a tomar, "pero esto ye un problema políticu que vamos tratar dende la racionalidá y el diálogu políticu y non a golpe d'estatutos". Poro, "a la vuelta Selmana Santa van convocase los conceyos pertinentes y van tomase les deciciones oportunes", anunció Iglesias.
El Bloque por Asturies, pela so parte, nun se pronunció sobre la nueva situación n'IU.
 

Contador Estadistiques