Texón torna al asturianu una escoyeta de poesíes del estauxunidense Raymond Carver

Los siguidores de Raymond Carver yá pueden lleer la so poesía n’asturianu. Pablo Texón espubliza con Suburbia Ediciones ‘Un corte de pelo’, una escoyeta de poemes del escritor estauxunidense n’edición billingüe.

Carver (1938-1988) ye un de los escritores más reconocíos de la lliteratura estauxunidense del sieglu XX. Los sos rellatos curtios recoyíos en llibros como ‘Will you please be quiet, please? (¿Quies facer el favor de callate, por favor?)’, ‘What we talk about when we talk about love (De qué falamos cuando falamos d’amor)’, ‘Cathedral (Catedral)’ o ‘Elephant (Elefante)’, catapultáronlu a la fama, anque’l del Clatskanie (Oregon) tamién trabayó mui bien la poesía con creaciones como ‘Near Klamath (Cerca de Klamath)’, ‘At night the salmon move (Los salmones muévense de nueche)’ o ‘A new path to the waterfall (Un camín nuevu hacia la catarata)’. Sicasí, estes obres nun tuvieron muncha repercusión fuera de los Estos Xuníos.

Gracies al llabor de Texón, el públicu asturianu va poder averase a la poesía de Carver tanto na so llingua orixinal, l’inglés, como n’asturianu. Asina, l’escritor ayerán fai una seleición de la obra poética del d’Oregon nun llibru de 64 páxines que tien un coste de 10 euros.