El vienres fina’l plazu pa matriculase nel cursu de llingua qu’entama Iniciativa pol Asturianu n’Uviéu

Iniciativa pol Asturianu entama un cursu de llingua asturiana n’Uviéu empobináu a persones con un nivel baxu de conocencia del idioma o ensin conocimientu nengún. El plazu pa matriculase fina’l vienres y les clases principien el llunes.

Éstes van impartise na sede del Conseyu de la Mocedá del Principáu d’Asturies, na cai Fuertes Acevedo númberu 10, los llunes, miércoles y vienres de 17 a 19 hores hasta sumar un total de 35 hores llectives. Les persones que quieran participar nesti cursu han d’abonar 50 euros, preciu qu’inclúi tolos materiales necesarios pa les clases, como’l manual ‘Xeitu’ y otros llibros. Al finalizar el mesmu, recibirán un diploma acreditativu de l’Academia de la Llingua Asturiana, entidá reconocida pola Conseyería d’Educación, Cultura y Deporte pa la formación del profesoráu.

Según informen dende Iniciativa pol Asturianu, el cursu va dar “una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con unes clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies”. El plazu pa matriculase nél fina’l vienres y el procedimientu pa formalizar la inscripción pue ser por dos víes: al traviés del corréu electrónicu contacto@vitorsuarez.com o nel teléfonu 699.117.473. Hai que destacar que la organización permite la posibilidá de facer el cursu on line, siempre qu’haya una xustificación debida.