El sábadu celebróse, con una participación alta, la Xunta Xeneral d’Iniciativa pol Asturianu. Nella aprobáronse les cuentes y el Plan d’Actividaes del 2013, nel que destaca una campaña destinada a implicar a empreses nel usu del idioma.
Inaciu Galán, presidente del coleutivu, encargóse d’abrir la sesión del muérganu de más importancia del coleutivu tres el Congresu con un discursu nel que criticó l’actitú de la clase política énte los problemes de la llingua. “Préstame ver qu’un añu dempués, ésta ye una organización cada día más completa, con más xente trabayando y con más reperscusión na sociedá asturiana. Pero’l trabayu pa salvar la llingua asturiana ye a contrarreló. Tenemos un idioma que muerre, una clas política que nun pon soluciones y una sociedá entá poco concienciada. El llabor nun ye fácil, pero préstame pensar que consiguimos xenerar una ferramienta útil pa trabayar pol futuru del idioma”, afirmó l’escritor y periodista.
Tamién quixo destacar el llabor fechu nos doce meses últimos, “nos que se trabayó con munches ganes y nos que cumplimos munchos de los oxetivos que mos plantegamos”, y animó a los socios a siguir trabayando “pa xenerar un clima social de sofitu a la llingua asturiana, en contautu con asociaciones, partíos, y en xeneral, tola sociedá civil; a pie de cai”. Nesi sen, Galán apuntó la necesidá d’afondar na representación nos conceyos, porque “les instituciones llocales son quiciabes les entidaes que más pueden facer pola visibilidá del idioma”, y señaló que “tenemos que tar enriba d’ellos, pidiendo más; sollertes a los retrocesos”. P’acabar, recordó la importancia nel usu del idioma nel día a día pa crear “conciencia a favor de la llingua asturiana”.
Darréu, presentóse l’Informe de Xestión 2012 a los socios, documentu que recueye les actividaes reivindicatives y culturales entamaes pola organización l’añu pasáu, y aprobóse un presupuestu superior al del 2012 que va permitir aumentar les posibilidaes del coleutivu a la hora de sacar material y d’ampliar presencia na cai. Nesi aspeutu, Iniciativa pol Asturianu va continuar trabayando ensin solicitar subvenciones, tirando de los recursos propios.
Otra manera, tamién salió alantre’l Plan d’Actividaes del 2013, ente les que destaca una campaña destinada a implicar a les empreses nel usu del asturianu. “Trataremos d’establecer convenios individuales con empreses, nel mesmu sen al que fiximos con Splitweet, tanto con firmes grandes como col pequeñu comerciu”, apuntó Galán a Asturies.com. La intención del coleutivu ye crear un apartáu na web con una guía coles empreses que tienen en cuenta la cuestión llingüística, ayudando asina a la so promoción, y trabayar tamién en concienciar a la ciudadanía col envís d’ampliar la demanda de productos y servicios nos que l’asturianu tenga presencia.
Cambios en dellos cargos de la organización
Otra campaña na que va enfotase’l coleutivu esti añu ye la potenciación nel usu del idioma nos medios de tresporte, tanto n’autocares como en trenes, estaya de la que s’ocupará Andrés Astur Treceño. Pela so parte, Xurde García Cilleros va encargase de la vocalía de Voluntariáu cola intención d’aumentar el númberu de socios que s’impliquen nel trabayu del día a día y, d’esta forma, tener una mayor presencia na cai. “Queremos tar en toles fiestes y mercaos que podamos; recuperar presencia na cai más allá de feches concretes, como pue ser el Día de les Lletres”, señaló Galán. Otra novedá nos cargos de la organización ye la incorporación de Teno Prau Tuñón como ayalgueru.
Tres la celebración de la Xunta Xeneral nel Auditoriu d’Uviéu, tuvo llugar una espicha na sidrería La Pumarada, que tamién contó con una participación importante. “Toi mui satisfechu pola asistencia a los dos actos y, sobre manera, poles idees y aportaciones de los socios y l’ánimu qu’amosaron”, destacó Galán sobre la xornada.
Na semeya, un momentu de la intervención de Galán.
Adxuntu | Tamañu |
---|---|
![]() | 25 KB |