Hevia: “Dende’l 1880, el modelu de botella de sidra malpenes camudó”

El trabayu ‘La botella de Xixón. Oríxenes y desendolcu hestóricu de la botella de sidra d'Asturies', ganador del V Premiu Fierro Botas, ta acabante de ser espublizáu. El so autor, Inaciu Hevia Llavona (Xixón, 1965), faló con Asturies.com del mesmu.

Esti trabayu supón una incursión suya nueva nel mundu de la sidra.

Si, depués de ‘Sidra y llagares tradicionales asturianos’, nel 2006, y de ‘Sidra y lagares tradicionales en tierras de Maliayo”, nen 2011, tamién ficimos dalguna collaboración en delles revistes especializaes y otros cartafueyos, y la entrada correspondiente a ‘Sidra’ na ‘Enciclopedia de Cabranes’, en formatu dixital. Agora tratamos esti tema que fasta güei tuvo mui pocu tocáu.

¿Por qué esti enfotu n’estudiar aspeutos de la cultura sidrera asturiana?

Porque al dir afondando nel estudiu de la sidra dende la perspeutiva etnográfica, vamos viendo estayes interesantes que tovía tan ensin trabayar. De toes maneres, el trabayu de campu permítenos tamién garrar datos d’otros asuntos, nun solu de la cultura de la sidra.

¿Trátase d’un tema un tanto escaecíu polos investigadores asturianos?

Agora mesmu paez qu’hai un ciertu interés pol tema, pero demientres permunchu tiempu sí ye verdá que tuvo bastante abandonáu. Sicasí, de forma puntual hai dalguna publicación que rescampla dalgo, pero en xeneral falta bibliografía; falten estudios d’equí, onde la sidra ye más que una bebida, ye una cultura complexa y mui identitaria d’Asturies.

Nesta ocasión, estudia la botella de sidra asturiana, un recipiente que tien poco más de 125 años de vida.

Sí, anque la sidra lleva embotellándose equí, polo menos, dende’l sieglu XVIII, les botelles yeren importaes, y entós, cares y escases. El nacimientu de les primeres vidrieres asturianes a mediaos del XIX ta del tou venceyáu a la necesidá d’embotellar la sidra. P’hacia’l 1880 ye cuando se diseña un modelu específicu pa la nuesa sidra. D’entós p’acá, malpenes camudó’l modelu, namás lo que fizo la modernización teunolóxica del procesu de fabricación.

Na presentación del llibru, editáu por Trabe, comentó que “la botella de sidra foi un referente na industrialización de Xixón”.

Como diximos, les vidrieres nacieren col enfotu de fabricar los envases pa sidra, pero bien llueu l’aumentu de la producción y la diversificación de productos, y sobre tou la calidá algamada, tantu nel procesu fabril como nel diseñu artísticu, ficieren d’estes empreses referencies mundiales, con abondos premios n’esposiciones nacionales ya internacionales. Dieren trabayu a muncha xente y demientres munchos años.

¿Qué carauterístiques tien la botella de ‘molde fierro’ o botella de sidra asturiana?

Magar que La Industria entamó fabricando pa sidra botelles bordeleses y otres derivaes de modelos ingleses, paez ser que fueren los direutores téunicos de la fábrica, primero Luis Truan, y llueu’l so fíu Alfredo, los que discurrieren diseñar asina esti modelu, con una capacidá aprosimada a la midida de consumu del país, como ye la puchera, d’unos 700 centímetros cúbicos y con una forma amañosa pal peculiar estilu de serviciu nuestru, como ye’l echalo n’altu. La botella sidra asturiana tien unos 280-285 milímetros d’altor, unos 82-88 de diámetru, un pesu de 600-800 gramos, y una capacidá pente 690-720 centímetros cúbicos de capacidá, de manera aproximada y dependiendo de la antigüedá de la so fechura.

¿En qué camudó col pasu los años?

L’anovación teunolóxica de la maquinaria de fabricación fizo sobre too que fueren de vidriu más finu, con menos pesu, y tamién con unos pocos milímetros menos de diámetru, y la forma del cuellu y del hombru más suavizada. Tamién se faen con vidriu menos escuru qu’enantes, pero básicamente’l diseñu ye’l mesmu.

¿Foi la so creación l’aniciu del escanciáu?

Non. L’escanciáu en botella lo únicu que fai ye asonsañar el mesmu fenómenu que se producía al espichar dende’l tonel a les xarres qu’habia antaño. Lo que se trataba yera de romper la sidra pa sacar el carbónicu y asina apercibise meyor de les sos propiedaes: golor, sabor, etc. Podemos dicir que l’espiche dende’l tonel yá yera una forma d’escanciáu.

El so estudiu céntrase en Xixón. ¿Había otres industries vidrieres nel país que fixeran botelles de sidra?

Sí, hubo otres dos vidrieres n’Avilés, y El Gaiteru tamién tuvo la suya propia en Villaviciosa, anque namás fabricaba de la forma axampanada. Nel trabayu menciónense toes, pero ye induldable que les más importantes, por tamañu y producción, fueren les de Xixón. La Industria trabayó del 1844 al 1954 al llau del actual Paséu de Begoña, y en La Calzada tuvo Gijón Industrial, aniciada nel 1900, que trabayó fasta 1913, pero que depués volvió a abrise col nome de Gijón Fabril nel 1915 y fizo botelles fasta’l 1981.

Dende’l zarru de Gijón Fabril esti recipiente tán carauterísticu nun se fabrica n’Asturies.

De magar 1981 les botelles pa la nuesa sidra traense d’otres fábriques de VICASA, en Burgos, Zaragoza, Sevilla, Vigo, Lleón, ya inclusu de Portugal. Ye difícil d’entender, porque esti modelu de botella namás que s’usa en tool mundu pa sidra asturiana, pero esi tema yá entra dientro de la estratexa y los criterios de la empresa, y poco se pue facer al respeuto. De toes maneres, tenemos informaciones de que dalgún estudiu col proyeutu d’una fabrica de botellería n’Asturies viose como factible. Nun sedría nada descabellaú, anque namás fuera pol aforru nos costes del tresporte. Como yá dixéramos, siguen tristemente d’actualidá les pallabres de Xovellanos, qu’a finales del sieglu XVIII quexábase de que, teniendo materia prima abondo, nun hubiere equí quien ficiere una botella pa corchar la nuesa sidra.

El trabayu resultó ganador del Premiu Fierro Botas. ¿Qué supunxo pa vusté algamar esti gallardón?

Ye un arguyu bien grande que’l propiu pueblu d’ún  reconoza esti llabor d’años. Y amás de la dotación económica, que ye bien d’agradecer, la espublización de la obra presta enforma.

¿Resultó-y difícil atopar información sobre esta temática?

Amás de la imprescindible consulta bibliográfica sobro’l tema, esti trabayu sofítase n’un porcentaxe grandísimu nel trabayu de campu: visites a vieyos llagares per toda Asturies, entrevistes con toda triba de xente, llagareros,  trabayadores y direutivos de les vidrieres…. Sobre too ye movese munchu; ver muncha xente y munchos llagares. Ye un trabayu d’años, nun esclusivamente dedicáu a esto, pero nel que se van anotando coses.

El llibru incorpora tamién multitú de semeyes y planos.

El materia gráficu actual y d’antañu ye imprescindible. L’actual procede casi too del nuestru archivu, pero’l vieyu tenemos qu’agradece-ylu a muncha xente: instituciones públiques y privaes, y trabayadores de les vidrieres.

¿Ta perdiéndose muncha información sobre’l patrimoniu industrial asturianu?

Sí, pero non sólo información, sinón tamién el propiu patrimoniu históricu, industrial, etnográficu…. Ta pasando per malos momentos.

¿Prentende siguir estudiando sobre estes temátiques?

El patrimoniu etnográficu asturianu ye mui interesante y siguiremos faciendo dientro de les nueses posibilidaes –les d’un particular ensin dengún sofitu institucional– lo que podamos, qu’amás ye lo que nos presta, mesmu dientro del mundu de la sidra, como n’otres estayes.