Asturies celebra’l Día Internacional de la Llingua Materna col idioma nuna situación delicada

La falta d’oficialidá y el peligru de desaniciu que vive la materia d'asturianu cola Llei Wert lleven al idioma a vivir el Día Internacional de la Llingua Materna nuna situación delicada. Esti xueves celébrense delles actividaes venceyaes a la llingua.

La UNESCO escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistaní nuna manifestación en Dhaka pola defensa de la llingua bengalí. La primer celebración d’esta xornada foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá. Nesta ocasión, el tema escoyíu pol organismu de Naciones Xuníes ye ‘El llibru, exe de la educación en llingua materna’.

Asturies celebra esti Día Internacional de la Llingua Materna na situación más delicada pal idioma de los 30 años últimos. La Llei Orgánica pa la Meyora de la Calidá Educativa (LOMCE) que pretende impulsar el ministru Wert dexa a la materia de Llingua Asturiana y Gallego-asturiano a un pasu del desaniciu y la pasividá que ta amosando nesti tema la conseyera Ana González nun da pie a munches esperances, lo que ta llevando al profesoráu y a los militantes del movimientu de reivindicación llingüística a dar la voz d’alarma. De salir alantre’l borrador actual de la LOMCE, col alcuerdu qu’anunció González con Wert, l’asignatura pasaría de ser voluntaria en Primaria a optativa –como ta agora en Secundaria y Bachilleratu–, condenándola a la desapaición del sistema educativo. La falta d’oficialidá torna a ser, otra vegada, la razón principal de que se dea esta situación.

Actividaes per tol país

Coincidiendo con esta xornada, n’Asturies van celebrase una bona cantidá d’actividá, principalmente nes escueles en clase de Llingua Asturiana y Gallego-asturiano. En Xixón, amás, per octavu añu consecutivu, la Oficina de Normalización Llingüística celebra un actu cultural nun colexu de la ciudá, nesti casu nel San Lorenzo, “col envís de dar a conocer la importancia de  les llingües y la diversidá cultural ente los escolinos y les escolines, al tiempu que camienten sobre’l papel qu’ellos pues cumplir nel respetu y espardimientu de les llingües, entamando pola propia, l’asturianu”. Nél, cola presencia de Carlos Rubiera, conceyal d’Educación, Cultura, Mocedá y Festexos, los escolinos y escolines van  lleer una frase nes distintes llingües qu’hai na escuela y van visitar la esposición del llibru ‘La llegada’, con testos de Mar Martín y dibuxos d¡Ánxelu González, ente otres munches actividaes.

El Serviciu de Normalización Llingüística de la Mancomunidá del Cabu Peñes va aprovechar el día pa presentar la campaña ‘El llibru pa lo más piquiñino de casa’, que tien como oxetivu cimeru “destacar la importancia de la familia como tresmisora xeneracional de la llingua materna, l'asturianu, como llingua vehicular nel usu comunicativu  habitual de munches families”. Mentes, en Samartín del Rei Aurelio va ponese en marcha la iniciativa ‘El to nome diz muncho de ti’, yá aniciada n’otros conceyos, que busca “fomentar los nomes tradicionales d’Asturies como elementos fundamentales na conciencia llingüística de la ciudadanía y como seña d’identidá”.

Avilés tamién celebra esti día con un actu d’homenaxe Bernardo Guardado Rodríguez, escritor avilesín ne llingua asturiana, nel Centru d’interpretación de La Carriona (13.30 hores). Yá pela tarde, a les 20 hores, va presentase nel mesmu llugar el llibru ‘Cipriano Folgueras. Una gloria d’Asturies’, de Lluis Portal.

Otra actividá venceyada a esta fecha, pero que se retrasa pal 1 de marzu, ye la gala del Premiu al Meyor Cantar, qu’escueye al tema más destacáu del 2012. Nesta ocasión van aspirar al gallardón los grupos ACD, con 'La güela'; Aire, con 'Enzo', Fala Non Caduca, con 'Escoyer el camín'; La Tarrancha, con 'Qué faer!'; y Taranus, con 'Ensin ti'.