Iniciativa pol Asturianu celebra esti sábadu la Xunta Xeneral añal

L’Auditoriu d’Uviéu va ser sede esti sábadu de la Xunta Xeneral añal d’Iniciativa pol Asturianu, muérganu más importante del coleutivu tres el Congresu. Pela nueche, l’asociación va celebrar una espicha en Gascona.

A la Xunta Xeneral pueden acudir asociaos, collaboradores y xente interesao n’aportar idees y propuestes de trabayu, anque, como ye lóxico, namái los miembros de la organización van tener derechu a votu. Nél, la direutiva presidida por Inaciu Galán va presentar l'Informe de Xestión 2012, onde se dará cuenta de l'actividá del coleutivu, les cuentes y demás cuestiones qu'afeuten a l'asociación. Amás, propondráse y discutiráse una fueya de ruta col llabor pa los doce meses vinientes, col envís d'organizar el trabayu de la organización. L’actu, de carauter añal, va principiar a les 17 hores nel Auditoriu d’Uviéu.

Hai que destacar qu’esti muérganu ye’l más importante de los que celebra esta organización que trabaya na normalización del idioma, namái superáu pol Congresu, que se convoque cada trés años, según marca los estatutos.

Espicha en Gascona

Tres la Xunta Xeneral, Iniciativa pol Asturianu entama una espicha de confraternización abierta a socios y simpatizantes. Ésta va tener llugar a partir de les 21.30 hores na sidrería La Pumarada, en Gascona, con un preciu de 18 euros y un menú, qu’inclúi la bébora –sidra, cerveza, vinu y agua–, compuestu por tortiella de pataca, chorizu a la sidra, croquetes de xamón, picadiellu con pataques, calamares a la romana, llacón con cachelos, pan y postres asturianos de la casa. Les persones interesaes n’acudir a esta celebración han d’ingresar los 18 euros na cuenta del coleutivu (0081-5657-41-0001063111, del SabadellHerrero) conseñando’l nome del inscritu y dar avisu nel corréu electrónicu contautu@iniciativapolasturianu.org. El día caberu pa facer el pagu ye’l xueves.