L’ATNL amuesa’l so esmolecimientu pol casu nuevu d’irregularidaes na convocatoria de places públiques

L’Asociación de Trabayadores de Normalización Llingüística (ATNL) comparte cola CSI y la XDLA la so esmolición pola convocatoria irregular d’una plaza de filólogu pa Política Llingüística. Recuerda que nun ye la primer vez qu’asocede.

Esti coleutivu diz tar avezáu a “denunciar anomalíes nes convocatories de places pa los Servicios de Normalización Llingüística nos conceyos, mesmo que la falta de mecanismos de control de la so actuación pol Principáu acullá de cuestiones económiques, asina como'l desinterés a la hora de buscar fórmules que garanticen la estabilidá y funcionamientu de los SNL, que nos meses últimos carecieron pieslles, non sustitución de baxes y l'aumentu de precarización nes condiciones llaborales de los y les sos trabayadores”. Siguiendo fiel a les sos demandes, l’ATNL comparte la esmolición de la Corriente Sindical d’Izquierda (CSI) y la Xunta pola Defensa de la Llingua Asturiana (XDLA) pola convocatoria pa la mencionada plaza de filólogu, cubierta dende xineru tres un procesu que los trés coleutivos califiquen d’irregular, como amuesa’l fechu de que nun s’esixera la titulación específica pal cargu, ente otros asuntos.

Los trabayadores de normalización llingüística recuerden que “nun ye la primer vez qu’asocede” y pon d’exemplu “l'anguaño inesistente Unidá de Traducción, nun área, la Direición Xeneral de Política Llingüística, que cuenta con una plantiya escaso”. “Desconocemos si la responsabilidá política d'estes irregularidaes correspuende al área de Función Pública o a Política Llingüística; sía como quier, y independientemente de los pasos xurídicos que la CSI decida dar d'equí pa en delantre, dende l'ATNL insistimos na denuncia fecha y esiximos una convocatoria pública, tresparente y afechisca pa col puestu que s'ufierta”, fina’l comunicáu.