La CSI denuncia irregularidaes na convocatoria d’una plaza de filólogu pa Política Llingüística

La estaya d’Alministración Autonómica de la Corriente Sindical d’Izquierda (CSI) denuncia irregularidaes na convocatoria d’una plaza temporal de filólogu pa Política Llingüística. Pide a Educación, Cultura y Deporte que declare nulu’l procesu.

La plaza, ocupada dende primeros d’esti añu, convocóse al traviés d’un procedimientu “opacu dafechu y en dellos aspectos hasta surrealista”, afirmen dende’l sindicatu. La primer cuestión que sorprende a la CSI ye que nun hubo convocatoria pública, sinón que s’utilizó’l Serviciu Públicu d’Emplegu d’Asturies pa facer una seleición ente demandantes de trabayu no se que vien denominando Ciudá Astur, la zona comprendida ente Xixón, Avilés y Uviéu, pese a que se trata “d’una seleición pa l’Alministración asturiana d’especialistes n’asturianu y gallego-asturiano”.Trés foron les persones llamaes, pese a que “tamos seguros de qu’hai munchos más titulaos en paru”.

Los trés filólogos preseleicionaos, que tuvieron qu’unviar el so currículu a Política Llingüística, nun conocieron el baremu nin lo que se-yos diba pidir hasta’l día enantes de la prueba, que consistió na valoración de los sos méritos, más una entrevista. “Lo llamativo ye que, anque la plaza yera pa un filólogu de la Oficina de Política Llingüistica, nun se pidía como requisitu imprescindible titulación oficial n’asturianu y/o gallego-asturianu, que sí esixe esa mesma conseyería pa impartir docencia y que los conceyos piden al personal de los sos servicios de normalización. Ye más, nel apartáu de méritos académicos namás se valoraben dos de les titulaciones oficiales qu’hai n’asturianu y non les titulaciones oficiales de gallego-asturiano, cuando na prueba oral sí se puntuaben les dos llingües”, espliquen, pa depués añadir que n’otros apartaos, “el baremu valoraba méritos de conocencies d’idiomes, docencia, publicaciones, conferencies, etc., non rellacionaos directamente col perfil cola mesma puntuación –y en dellos casos con más– que los puramente rellacionaos cola plaza”. Tampoco nun se espublizó la composición del tribunal nin pudo recurrise’l baremu, “pero como nun nos atopamos con un procesu públicu y tresparente ta malo de saber si hubo otres irregularidaes”.

La CSI entiende qu’esta convocatoria ye “una práutica vergoñosa y corrompida d’accesu a los escasísimos puestos de trabayu qu’ufierta” y solicita a la Conseyería d’Educación, Cultura y Deporte “que declare nulu tol procesu, rectifique y vuelva a entamase con tola tresparencia y con una baremación axustada al perfil de la plaza”, cola amenaza de llevar l’asuntu a los tribunales de nun haber una solución. El sindicatu critica tamién que tovía haya casos como ésti cuando “nos prometen añu tres d’añu, n’aburríos discursos políticos, qu’agora sí, qu’agora van ser más tresparentes en tolo que tenga que ver cola mesma Alministración. Los fechos vienen a demostrar xusto lo contrario”.

La XDLA pide tresparencia y esixe titulación p’acceder a ésti y otros puestos

Tres conocese la denuncia pública fecha pola CSI, la Xunta pola Defensa de la Llingua Asturiana (XDLA) emitió un comunicáu nel qu’esixe “la rectificación inmediata d'esti tipu d'irregularidaes y la puesta en marcha de convocatories y procesos selectivos qu'aseguren que los candidatos y candidates tienen les pertinentes titulaciones y compiten en condiciones d'igualdá a la hora de reconocer los sos conocimientos, meritos y esperiencia”. Pa la organización cívica “ye inalmisible que nun se pidiera titulación específica d'asturianu y gallego-asturianu pa ser filólogu nesi departamentu” y recuerda’l fechu acontecíu nel 2009 al crease la Unidá de Traducción, órganu que nun llegó a furrular porque a la persona encargada nun se-y esixía conocimientu d’asturianu nin de gallego-asturiano.

“Ye una reivindicación histórica del asturianismu la dignificación del profesoráu d’asturianu y pa ello yera imprescindible una reglamentación que regulara les titulaciones necesaries pa impartir la materia. Nun se podría entender que la Conseyería d’Educación y Cultura nun esixera tar tituláu pa dar clas d’asturianu o de gallego-asturiano. Lo mesmo asocede colos puestos de técnicos normalizadores nos conceyos, pa los que l’Asociación de Trabayadores de la Normalización Llingüística vien pidiendo una regulación clara nes convocatories, de manera que les entidaes convocantes pidan que los candidatos tean en posesión de determinaes titulaciones d’asturianu. Agora ye la práctica habitual. A pesar de too esto, ¿pue entendese que la entidá cimera en Política Llingüística, de la mesma Conseyería d’Educación y Cultura, cubra una plaza de filólogu/a especialista n’asturianu y gallego-asturianu ensin que se pida esa titulación?”, añadió la XDLA nel comunicáu.