Valle Roso: “Hai una montonera de guaḥes que principien na canción asturiana y que lo faen bien”

Fernando Valle Roso (Llangréu, 1986) ye un exemplu pa les xeneraciones moces qu’entamen nel mundu de la canción asturiana. Anguaño ta llevando los cantares de ‘Camín d’Ayures’, el so primer discu en solitariu, per toda Asturies.

¿Qué tal va la xira de presentación de ‘Camín d’Ayures’?

De momento los conciertos de presentación del discu foron too un ésitu, tanto n’Uviéu como en Cangas del Narcea o l’últimu nel Teatru Nuevu de La Felguera.

¿Ta contentu cola respuesta de públicu?

El públicu cuando va a los conciertos tampoco sabe mui bien qué van atopar, yá que me conocen del mundu de la canción asturiana y esto ye mui distinto, anque nun pierde la esencia de la cancion tradicional. El resultáu, sicasí, ye mui bono y vese nidio qu’a la xente presta-y, como amuesen les ventes de discos al finar los conciertos y tolo que disfruten mientres el conciertu.

Nestes actuaciones ta acompañáu d’un bon puñáu de músicos escelentes.

Pa esta xira de presentación cuento normalmente con Xaime Arias a los teclaos, Oscar Santos al baxu, Fernando Arias a les percusiones, Michael Lee Wolfe coles guitarres, Pablo Carrera a la gaita y Silvia Moreno, Carla Antuña y Carla Isidoro colos coros.

¿Cuántes feches más tien confirmaes anguaño?

Tán zarraes el 8 de marzu nel Teatru Riera de Villaviciosa y el 13 d’abril nel Teodoro Cuesta de Mieres.

¿Qué supón pa vusté esti trabayu discográficu?

Pues pa min trátase d’una evolución mui grande con respeuto a lo que vengo faciendo dende que principié nel mundu de la canción tradicional, onde esperimento con soníos nuevos.

¿Cómo lu definiría?

Ye un discu mui completu que recueye temes de lo más variao, dende canciones asturianes, que nun podíen faltar nel discu yá que ye’l mundu del que vengo, a cantares tradicionales con arreglos mui atractivos pal públicu, col oxetivu de facelos partícipes nos conciertos, y temes nuevos con arreglos que s’averen al reagge o al hip-hop, intentando asina llegar a un públicu mozu.

¿Ta teniendo bona aceptación?

La verdá ye qu’hai dellos temes que tán calando fondo nel públicu y que presten muncho.

Pese a la so mocedá, yá ye una de les voces consolidaes de la canción asturiana. ¿Cómo principió a cantar tonada?

Pues yá fai casi 13 años cuando la mio hermana y yo fuimos hasta casa d’Alfredo Canga pa ver si nos enseñaba dalgo d’esti mundu de la canción asturiana.

¿Qué-y resultó más difícil nesos primeros pasos nesti estilu?

Siempre son duros los años de l’adolescencia, cuando los paisanos camudamos la voz. Yo tuvi que tar ensin cantar un añu enteru y renovar tol repertoriu.

Nesti tiempu ganó dellos concursos. ¿Con cuál se quedaría?

La verdá ye que me quedo colos dos d’esti añu pasau: el que me dieron a la Meyor Voz del Añu 2012 nel Memorial Silvino Argüelles y el Premiu al Meyor Discu del Añu qu’otorga la televisión del Principáu.

La so hermana Marisa tamién ye una cantante de gran nivel. Tarán arguyosos en casa, ¿non?

Los mios pas siempre tán arguyosos de lo que facemos y siempre tán apoyándonos en too. Dende que principiamos a cantar acompáñennos a tolos sitios onde vamos.

Xuntos trabayaron muncho la tonada dialogada. ¿Van continuar con esta modalidá?

Por supuesto. La modalidá de canción a dúu ye de les más demandaes siempre que vamos a cantar pelos festivales. Amás hai un proyeutu futuru de facer un trabayu discográficu con cantares a dos voces.

Los dos son un referente pa la xente mozo qu’empieza na tonada. ¿Cree que tien futuru la canción asturiana?

Yo veo un bon futuru pa la canción. Si mires los festivales, hai una montonera de guaḥes qu’empiecen nesti mundu y que lo faen realmente bien. Esto se debe, en parte, gracies a la difusión que fai la TPA col programa ‘Sones’ de canción asturiana.

¿Qué otros proyeutos tien en mente cuando termine la xira actual?
Tres acabar la xira pretendo siguir trabayando y zarrar conciertos nuevos de cara al branu.