Compromisu por Xixón critica l’actuación de l’alcaldesa tres l’aumentu d’emisiones n’Arcelor

“Moriyón actuó más cómo la conseyera de mediu ambiente de la empresa que como la responsable municipal na materia”, afirma Compromisu por Xixón. La organización critica'l proceder de l’alcaldesa tres l'aumentu d’emisiones n’Arcelor-Mittal.

Daniel Fernández, voceru de Compromisu por Xixón, afirma nun atalantar por qué la primer edil tomara “como referencia los datos del propiu infrautor” tres l’aumentu d’emisiones na factoría xixonesa de la empresa anglo-india na madrugada del 17 de xineru tres el prendíu del fornu altu B tres sietes meses apagáu pa la so remodelación, una situación anómala que la Fiscalía va investigar. Esta actitú de l’alcaldesa ye pa Fernández una “falta de respetu a toles persones que sufrieron los efectos de les emisiones del altu fornu”. La Policía informó esta selmana que recibió más de 600 denuncies de particulares que vieron como les partícules de metal unviaes a l’atmósfera corroyó les chapes de los vehículos estacionaos na vía pública de zones cercanes a les instalaciones siderúrxiques, como Tremañes, Porceyo, La Calzada, Perchera o La Braña.

La organización tampoco nun ve almitible que “la responsable municipal de medioambiente se desentienda d'un tema como ésti porque hai otres instancies investigando les emisiones”, lo que vien a demostrar lo que los nacionalistes denunciaron delles vegaes: “Carmen Moriyón nun asumió les competencies de Mediuambiente, sinón que les escondió nun caxón”. Amás nun cree que fora casualidá que’l mididor de contaminación asitiáu en La Calzada, del que’l Conceyu de Xixón ye responsable, nun furrulara’l día de les emisiones. Al respeuto, Compromisu por Xixón demanda otra vuelta la instalación d’otru aparatu en San Andrés de los Tacones pa que nun se repitan situaciones como ésta, “anque, claro, siempres pueden estropiase los dos mididores al empar”, concluyó Fernández.

Compromisu por Asturies estrena web

La federación de partíos Compromisu por Asturies ta acabante d’estrenar un diseñu nuevu na so web. Nella militantes y simpatizantes van poder atopar información sobre la organización y sobre’l so trabayu diariu a nivel nacional y nos conceyos. Ésta ta todavía en prebes.