Los llectores d’Asturies.com creen que’l Gobiernu nun va facer un res pola asignatura d’asturianu

Un 69 por cientu de los nuesos usuarios considera que’l Gobiernu nun tien intención nenguna de salvar la situación cola que s’atopa la materia d’asturianu cola entrada de la Llei Wert. Mentes, un 16 por cientu cree posible la declaración d’oficialidá.

Nel ‘Conceyu Abiertu’ que plantegamos a los nuesos llectores entrugábamos qué pensaben que diba facer el Gobiernu del país cola materia de Llingua Asturiana y Gallego-Asturiano cola entrada de la Llei Orgánica pa la Meyora de la Calidá Educativa (LOMCE), conocida de forma popular como Llei Wert. De les cinco opciones qu’ufrimos la más votada foi la que dicía que l’Executivu ‘nun va mover un deu, provocando’l desaniciu del idioma del sistema educativu’, con un 37 por cientu del total, siguida de la que marcaba que diba ‘aprovechar la situación pa menguar la so presencia faciendo que l’asignatura sía optativa tamién en Primaria y non voluntaria’. Esto significa qu’un 69 por cientu de los nuesos usuarios nun ve nel Gobiernu del socialista Javier Fernández enfotu nengún en dar un papel dignu a l’asturianu na educación.

Por contra, un 16 por cientu confía en que la FSA-PSOE podría aprovechar el momentu pa declarar la oficialidá del idioma y asina impidir el desaniciu a la que se ve condergada la materia de Llingua Asturiana y Gallego-asturianu cola entrada de la LOMCE, y un 13 por cientu cree que va ‘promover una enmienda na norma que dexe les coses más o menos como tán agora’, esto ye, voluntaria en Primaria y optativa en Secundaria y Bachilleratu. Un 3 por cientu de los nuesos llectores votó pola opción ‘Nun sé’.

Mañana ta prevista una reunión nueva de la Conferencia Sectoria d’Educación en Madrid na que’l ministru José Ignacio Wert va aldericar sobre dellos aspeutos de la LOMCE colos conseyeros del ramu de toles comunidaes autónomes. Aprovechando esti conceyu, tán celebrándose dende ayeri dellos zarros y protestes entamaes polos estudiantes en defensa de la educación pública. En toles autonomías tán previstes mañana manifestaciones convocaes polos sindicatos educativos. L’asturiana, que cuenta col sofitu de SUATEA, FETE-UXT, CC OO, CSI, el Sindicato de Estudiantes y la FAPA Miguel Virgos, va celebrase n’Uviéu, con salida de la Estación de RENFE, a les 18 hores. Nella van participar los profesores de Llingua Asturiana y Gallego-asturiano cola pancarta ‘Llingua nes escueles, como les demás’.

‘Conceyu Abiertu’ nuevu

Dende esti mesmu momentu, los nuesos usuarios pueden votar nun ‘Conceyu Abiertu’ nuevu. Nesta ocasión queremos saber creen que’l presidente del Gobiernu estatal, Mariano Rajoy, ha de dimitir poles sospeches de corrupción nel Partido Popular (PP) qu’afeuten a la cúpula del partíu.