L’ALLA y la comunidá educativa reclamen la oficialidá pa salvar la desapaición del idioma na educación

La opinión ye unánime: la Llei Wert trai consigo la desapaición del idioma na educación y la solución del Gobiernu, un empeoramientu de la so situación. Sindicatos, estudiantes, padres y l’ALLA reclamen la oficialidá pa salvar la LOMCE.

Ana María Cano, presidenta de l’Academia de la Llingua Asturiana (ALLA), foi la encargada de lleer un documentu consensuáu pola institución académica, los sindicatos SUATEA, CC OO y FETE-UXT, el Sindicatu d’Estudiantes y les organizaciones de padres FAPA Miguel Virgós y FAPAS-Xixón, nel que soliciten al Partido Popular, a los Gobiernos estatal y nacional, a les fuerces polítiques de la Xunta Xeneral y a tol pueblu asturianu “la so esmolición y esixencia d’una solución efeutiva pa la escolarización del asturianu”. Un pasu más dientro d’una serie de demandes pa evitar la desapaición del idioma nel sistema educativu qu’anició la ALLA n’avientu cola alvertencia de la falta de güecu de l’asignatura de Llingua Asturiana y Gallego-asturiano na Llei Orgánica pa la Meyora de la Calidá Educativa (LOMCE) impulsada pol ministru Wert tal como ta redautada anguaño, y l’encamientu al Gobiernu d’Asturies de que moviera ficha, pa lo que propunxo una enmienda de mínimos nel testu que garantizara l’enseñu voluntariu del asturianu.  

Los sindicatos educativos y los estudiantes, que yá veníen denunciando esta normativa por considerala un ataque a la educación pública, espresaron tamién el so esmolecimientu pola situación na que quedaría l’idioma, mentes que la conseyera d’Educación, Cultura y Deporte, Ana González, facía unes declaraciones refugando la cooficialidá y amosando’l so compromisu de treslladar a José Ignacio Wert la situación peculiar del asturianu, con reconocimientu xurídicu y implantación curricular, pero ensin estatus d’oficialidá. La reaición del Sindicatu Unitariu y Autónomu de Trabayadores de la Enseñanza d’Asturies (SUATEA) foi la convocatoria d’un conceyu informativu col profesoráu de l’asignatura al considerar que “l’asturianu desapaez del sistema educativu” cola entrada de Llei Wert pola falta d’oficialidá del idioma, del que salió una serie de movilizaciones por parte de los maestros de Llingua Asturiana y Gallego-Asturiano tanto nes aules como na cai y la rede.

El xueves pasáu, dos díes depués de la nomada asamblea, González anunciaba un alcuerdu con Wert que volvía a prender toles alarmes: el ministru mostrábase favoratible a incorporar una disposición adicional qu’asegurara “la ufierta obligatoria”, en pallabres de la conseyera, de l’asignatura nos centros educativos. Una solución que dexa la situación del idioma en Primaria énta peor qu’anguaño, al pasar de ser voluntaria a optativa y competir cola segunda llingua estranxera –francés na mayor parte de los centros– y con Educación Artística. Mentes en Secundaria y Bachilleraru, onde yá ye optativa, pasaría a formar parte d’una llista de materies entá más amplia que na actualidá.

Desapaición a mediu plazu

Esta situación actual ye la que lleva a l’ALLA, sindicatos educativos, estudiantes y asociaciones de padres a axuntase pa facer fuercia y frenar una situación que “conderga a la desapaición del asturianu del sistema educativu a mediu plazu; en cuatro o cinco años”, afirma Faustino Zapico, miembru de la secretaría de SUATEA, que califica les pallabres últimes de la conseyera de “inaceptables”, al considerar que “trata de dir de salvadora” cuando ta firmando’l desaniciu de l’asignatura. Nel documentu conxuntu robláu por estos coleutivos, y lleíu por Cano, señalen que “queremos que se nos sienta nunos momentos que puen ser decisivos pa la sobrevivencia de la llingua y cultura d’Asturies. Somos sabedores qu’estos y otros problemes –emplegu de la llingua na Alministración, nos medios de comunicación públicos, toponimia, etc. – tienen el so orixe na falta de reconocimientu xurídicu del asturianu como llingua oficial; poro, reclamamos esi estatus xurídicu d’oficialidá, entendiendo qu’ésta ha afayase a la realidá social y económica d’Asturies, y teniendo tamién en cuenta la nuesa tradición cultural y sociollingüística. Reclamamos, en definitiva, un consensu políticu ampliu que defina les carauterístiques qu’ha tener la oficialización de la llingua, les sos fases d’aplicación y los recursos que, acordies cola situación de crisis que nos llenda, puen destinase a esti fin”.

D’igual forma, esixen tamién, “col mayor puxu”, que los redautores de la LOMCE tengan en cuenta que l’asturianu “tien un reconocimientu xurídicu como llingua, amás de plenu calter curricular”, pa qu’actúen en consecuencia, esto ye, “faciendo porque la escolarización de la llingua asturiana s’allugue con xeitu al llau del restu de les aries llingüístiques”. “Ye inalmisible cualquier tratamientu llegal que rebaxe l’actual estatus escolar del asturianu”, afirmen los coleutivos firmantes del documentu, que considera que la situación del idioma tendía que meyorase “n’aspeutos como’l númberu d’hores d’impartición, calter del aria –especialidá pal profesoráu de Primaria y Secundaria–, xeneralización a tolos centros, etc.”. Por último, comprométense a tar sollertes sobre esta cuestión y a llevar la so voz “onde seya necesario”.

Ellaboración d’un informe pa unvialu a Madrid

Tres la llectura del documentu, Cano señaló a los medios presentes que conversara colos representantes de los partíos políticos mayoritarios y cola conseyera –tres la reunión d’ésta col ministru Wert– y la diputada del PP responsable d’Educación na Xunta Xeneral, Susana López Ares, pa tratar “la situación grave na que tamos”, y que tenía pidíos conceyos col presidente del país, Javier Fernández, y cola presidenta del PP d’Asturies, Mercedes Fernández. Darréu recordó que se llega a esti puntu pol fechu de que “tolo que se llexisla dende Madrid tien en cuenta namái les llingües cooficiales. Les que nun lo son, nun esisten a efeutos de llexislación del Gobiernu central”.

La presidenta de l’ALLA tamién calificó de “inalmitible” la ufierta de la conseyera nel casu de que nun se respete la voluntariedá de l’asignatura, alcordies col Estatatu d’Autonomía y la Llei de Promoción y Usu del Asturianu, y que la situación en Primaria sía “como la que güei tenemos en Secundaria y Bachilleratu”. Pol último, anunció la preparación d’un informe “sobre la situación sociollingüística y educativa n’Asturies” col envís d’unvialu al ministru d’Educación, Cultura y Deporte, y al presidente del Gobiernu en Madrid.

Na semeya –d’izquierda a derecha–, Enrique Fernández, secretariu xeneral de la Federación d’Educación de CC OO; Ana María Cano; Faustino Zapico; y Daniel Rodríguez Vázquez, secretariu xeneral de FETE-UXT.