La XDLA califica de “engañoses” les declaraciones de González sobre l’asignatura d’asturianu na LOMCE

Les declaraciones d’Ana González, nes qu’afirmaba que “l’asignatura de Llingua Asturiana va ufiertase de forma obligatoria en tolos centros”, son “engañoses” pa la XDLA. La materia pasaría a ser optativa en Primaria cola LOMCE.

Estes pallabres de la conseyera d’Educación, Cultura y Deporte “nun son sólo insuficientes, sinón que son engañoses al non especificase les condiciones nes que va tar presente depués d’aplicar la nueva reforma educativa”, apunta la Xunta pola Defensa de la Llingua Asturiana (XDLA) nun comunicáu. El coleutivu cívicu esplica que col alcuerdu algamáu col ministru Wert, anunciáu’l xueves por González, pa incorporar una disposición adicional na Llei Orgánica pa la Meyora de la Calidá Educativa (LOMCE), l’asignatura dexaría de ser voluntaria en Primaria, “situación na que s’atopa anguaño, pasando a ser optativa” compitiendo con otres materies, “incumpliendo d’esta forma la Llei d’Usu y Promoción del Asturianu”. En Secundaria siguiría como optativa, anque nuna llista na que s’incorporaríen más materies que n’actualidá.

La XDLA considera que la posibilidá única pa salvar esta situación tan delicada a la que s’enfrenta l’asignatura de Llingua Asturiana y Gallego-asturiano cola entrada de la nomada ‘Llei Wert’ ye la declaración de la oficialidá del idioma y la creación de la Especialidá de Llingua Asturiana prometida pola conseyera pa esta llexislatura.

Pela so parte, Compromisu por Asturies apunta que “la Conseyería d’Educación vuelve a engañar col tema l’asturianu”. La vocera de la federación de partíos, Yolanda Huergo, señala que l’alcuerdu anunciáu por González “nun supón avance nengún respecto a lo que yá teníemos” y sí “un empeoramientu nes condiciones de l’asignatura”. Tamién recuerda que la responsabilidá nesti asuntu ye únicu del Gobiernu del país y ataca l’actitú del PSOE, que “como lleva faciendo durante los últimos años, xuega a dicir una cosa y facer otra”.

Rueda de prensa convocada pola ALLA

L’Academia de la Llingua Asturiana (ALLA), dao’l panorama que s’abre cola anuncia dada pola conseyera, convocó a los medios de comunicación pa mañana al meudía pa dar la so visión sobre l’asuntu. Nel actu tamién va participar SUATEA, FETE-UXT y CC OO, el Sindicatu d’Estudiantes y  les organizaciones de padres d’alumnos FAPA Miguel Virgós y  FAPAS-Xixón.