González anuncia un alcuerdu con Wert pa que l’asturianu nun desapaeza cola reforma educativa

La LOMCE incorporará una disposición adicional qu’asegurará la ufierta de Llingua Asturiana y Gallego-asturiano. Ana González anunció’l xueves un alcuerdu col ministru Wert pa evitar la desapaición de la materia del sistema educativu.

La conseyera d’Educación, Cultura y Deporte comunicó la bona disposición del popular enantes de participar nuna charra n’Avilés, entamada pol PSOE, baxo’l nome ‘Debate proyecto LOMCE, ¿una contrarreforma educativa?’. Según esplicó, aconceyó con José Ignacio Wert pa tratar la situación especial del asturianu, ensin oficialidá pero con reconocimientu xurídicu y implantación curricular, y ésti mostróse favoratible a incorporar una disposición adicional qu’asegurara la ufierta de l’asignatura nos centros educativos asturianos non universitarios. Por ello, la conseyería va unviar al ministeriu una propuesta de testu pa que s’incluya na Llei Orgánica pala Meyora de la Calidá Educativa (LOMCE).

D’esta forma, González confirma la so decisión de refugar la declaración d’oficialidá del idioma pa salvar la situación y apuesta por una fórmula cercana a la “enmienda de mínimos” que propunxo l’Academia de la Llingua Asturiana pa evitar el desaniciu de la materia de Llingua Asturiana y de Gallego-asturiano del sistema educativu, situación que traería unes consecuencies catastrófiques pal futuru del asturianu.