El númberu 11-12 de la Revista de Filoloxía Asturiana yá ta disponible

El Seminariu de Filoloxía Asturiana algamó l’oxetivu de poner al día la so revista cola entrada del 2013. Yá ta disponible’l númberu 11-12 de la espublización tanto en papel como en formatu dixital al traviés de la plataforma Reunido.

Xulio Viejo Fernández, direutor de la revista de Filoloxía Asturiana, anunció en xunu, mentes la presentación n’Uviéu de los númberos que van del 6 al 10, retrasaos por mor de “dificultaes organizatives y económiques”, que la intención del so equipu yera la de mantener la periodicidá añal comprometida cola espublización del 11-12, correspondiente al bieniu 2011-2012. Esti deséu de Viejo ye agora realidá con esti volumen nuevu, disponible en papel (Ediciones Trabe) y na plataforma dixital Reunido de la Universidá d’Uviéu.

El númberu 11-12 de la Revista de Filoloxía Asturiana contién los estudios ‘Dos poetes de la primera metada del XVIII: Xuan Fernández Porléi y Nicolás Torano de la Puerta’, de Xuan Carlos Busto Cortina; ‘Morfoloxía nominal y diptongos decrecientes n’asturianu’, de Viejo; ‘Vocabulario de eusquerismos en las jergas gremiales de Asturias y del Noroeste de la Península (II)’, de Ramón d’Andrés Díaz; ‘El Libro de las Constituciones de D. Gutierre de Toledo, obispo de Oviedo (1377-1389). II. Estudio morfosintáctico. La oración simple’, d’Antonio José Meilán García; ‘Estratexes na reconstrucción de migraciones humanes y de la variabilidá llingüística con modelos xenéticos’, de Xosé María Fernández; y ‘Le origini linguistiche della Sardegna’, d’Eduardo Blasco Ferrer. Tamién inclúi les notes ‘El topónimo asturiano La Bordinga, un límite de los suevos’, de Martín Sevilla Rodríguez, y ‘A propósito de Introducción a los problemas y métodos según los principios de la Escuela Dialectométrica de Salzburgo, de Hans Goebl’, de Xavier Casassas Canals.

Completen esti volume les necrolóxiques de Jesús Neira Martínez (1916-2011), fecha por D’Andrés, y de Ramón Valdés del Toro (1930-2011), obra de José Uría Ríos, y les reseñes siguientes: ‘Ramón Rodríguez Corao, Vocabulariu de Ruenes (El Valle Altu de Peñamellera)’, de María Cueto Fernández; ‘Ramón d’Andrés Díaz (coord.), Lengua, ciencia y fronteras’, de Gotzon Aurrekoetxea; ‘Mánfer de la Llera, De la rampla a la pluma’, de Miguel Rodríguez Monteavaro; ‘ Vanessa Gutiérrez, La quema’, de Carlos X. Ardavín Trabanco; y ‘María Cueto Fernández ya Xulio Viejo Fernández, Onde la palabra pousa. D’Asturias a Miranda: Crestomatía del asturḷḷionés occidental’, de  Nicolás Bartolomé Pérez. Zarren la espublización les seiciones ‘Crónica’, na que s'informa de congresos, tesis doctorales y otres noticies académiques, y ‘Resúmenes / Abstracts’, n'asturianu, castellanu y inglés, de los trabayos espublizaos.