Compromisu por Xixón reclama “la restitución inmediata de la toponimia oficial” nel conceyu

La denuncia fecha pola XDLA sobre’l cambiu de cartelos na zona rural xixonesa con topónimos non oficiales lleva a Compromisu a reclamar “la restitución inmediata” de los nomes de llugar asturianos. Califica l'aición de “insultante”.

Compromisu por Xixón amosó la so sorpresa pola situación que se ta viviendo nes parroquies del conceyu por una decisión “que va muncho más allá de lo que se podría esperar, inclusive poniéndonos no peor, no que se refier a la política del gobiernu municipal en rellación a la cultura asturiana”. Pa la federación de partíos resulta “insultante y d'estrema gravedá que non solo nun se meyore na normalización del asturianu, como Foro prometió na so campaña electoral, sinón que se tea desaniciando lo poco que consiguiera avanzar” nesta estaya.

Los nacionalistes recuerden que “costó años de llucha que los nomes asturianos, los que siempres se dixeron y formen parte de la nuesa cultura y de la nuesa hestoria, apaecieren nos cartelos”, polo que consideren que “nun ye de recibu qu'agora desapaezan cuando amás son los llegales y tán aprobaos tantu pol conceyu como pol gobiernu asturianu”. Por último, llamenten que’l gobiernu municipal de Foro Asturias Ciudadano emplegue perres públiques “pa estropiar lo que, per una vegada, taba bien fecho”.