Abiertu’l plazu de matrícula pa la prueba de conocencia de l’ALLA

El sábadu 26 de xineru va tener llugar una convocatoria nueva de la prueba de conocencia de l’Academia de la Llingua Asturiana (ALLA). Nesta ocasión pasa a celebrase nel edificiu sur de la Facultá de Formación del Profesoráu y Educación.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del primer de los dos esámenes que celebra tolos años –el segundu ye en mayu– y que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

L’esame cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma.

Les persones interesaes en facer la prueba de conocencia tienen de plazu hasta’l 24 de xineru pa formalizar la matrícula nel horariu siguiente: de llunes a xueves, de 9 a 15 hores y de 16 a 19 hores; y los vienres, de 9 a 14 hores. L’esame va celebrase’l 26 de xineru, a les 9.30 hores, na Facultá de Formación del Profesoráu y Educación de la Universidá d’Uviéu, asitiada nel campus de Llamaquique, cola novedá de que nesta ocasión va tener llugar nel edificiu sur.