Valdesoto celebra esta fin de selmana les Xornaes de Mazcaraes d'Iviernu

Los Sidros y Les Comedies van desfilar esti domingu per Valdesoto, actividá que nesta ocasión s’enmarca nun alcuentru astur-portugués nel conceyu. Ésti inclúi un conciertu, una feria y unes xornaes gastronómiques dedicaes al bacaláu.

L’Asociación pola Recuperación de Los Sidros y Les Comedies El Cencerru entama por sestu añu consecutivu les sos mazcaraes d’iviernu, que van percorrer el domingu, a partir de les 11.30 hores, les caleyes de Valdesoto hasta les 13 hores, cuando van representase nel campu la Ilesia les obres ‘La crisis de la modernidá’, de Pergentino Martínez, y ‘Un ERE de comedia’, de José Ramón Oliva. Aprovechando esta cita, qu’atrae tolos años a una gran cantidá de xente al conceyu, El Cencerru y el coleutivu portugués Progestur entamen, xunto col Conceyu de Siero, unos alcuentros astur-portugueses nel conceyu que busquen averar la cultura del país atlánticu a los asturianos. La primer actividá va ser l’apertura na plaza cubierta de La Pola Siero, esta tarde a les 16 hores, d’una feria de productos artesanales y agroalimentarios que va abrir tol fin de selmana n’horariu de 11 a 21 hores. Tamién tán previstes delles charres nel Centru Cultural de Lliceñes a partir de les 20 hores de güei.

Mañana, sábadu, va celebrase un desfiles peles cais de La Pola, a partir de les 18 hores, con salida del Auditoriu y final na plaza cubierta, previu pasu por Les Campes. Precisamente l’Auditoriu va ser sede a les 20 hores d’un conciertu de baldre de Skanda y de los portugueses Zingamocho. Completen les actividaes d’esta fin de selmana unes xornaes gastronómiques dedicaes al bacaláu nel que participen seis establecimientos hosteleros de la ciudá: El Cuévano, Abrelatas, La Petaca, El Pumarín, La Teya y El Culetín. El preciu únicu del menú ye de 15 euros.