Los llectores d’Asturies.com apostaron por regalar discos y llibros n’asturianu nes feches navidiegues

Un 52 por cientu de los usuarios d’Asturies.com regaló discos y llibros n’asturianu nesta Navidá. Mentes, un 23 por cientu diz apostar por esti tipu de productos, anque refuguen el consumismu imperante nestes feches.

Coincidiendo cola puesta en marcha de la campaña ‘Regála(te) discos y llibros n’asturianu’, entamada pola Xunta pola Defensa de la Llingua Asturiana (XDLA), entrugamos nel nuesu ‘Conceyu Abiertu’ a los llectores d’Asturies.com si en Navidá diben regalar productos qu’utilizaren la llingua asturiana. Un 52 por cientu afirmó apostar polos llibros y discos na nuesa llingua, mentes qu’un 23 por cientu dixo que prefier mercalos pa otru tipu de celebraciones, como cumpleaños, por nun tar d’alcuerdu col consumismu qu’impera nes feches navidiegues. Por contra, un 24 por cientu nun se decantó por productos culturales n’asturianu pa regalar a los seres queríos.

Dende esti mesmu momentu los nuesos usuarios yá pueden votar nun ‘Conceyu Abiertu’ nuevu. Nesta ocasión queremos conocer qué-yos paez a los llectores la figura de L’Anguleru, personaxe que ta garrando puxu n’Asturies, como alternativa al anglosaxón Santa Claus. Creáu por l’Asociación Cultural Garabuxada, de L’Arena, trátase d’un pescador asturianu d’angula que reside nel mar de los Sargazos –llugar de cría d’esti animal–, que viaxa hasta Asturies pa llegar a tiempu en Nuechebona pa pescar esti alevín. Coles perres que saque de vender les sos captures, merca regalos a les neñes y neños asturianos que reparte esa mesma nueche. L’Anguleru vien en Navidá porque ye época d’angula y entra nel país pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.