La enseñanza n'Asturies vive una xornada de fuelga

Alredor de 11.000 docentes de les enseñances non universitaries tan convocaos polos sindicatos SUATEA, CC.OO, CSIF y ANPE a una fuelga pola negativa de la Conseyería a reunir la mesa sectorial d'educación y a retirar el plan d'evaluación de docentes. Según una primer valoración de los convocantes, el paru ye seguíu por un 80% del profesoráu del país, lo que ye "un éxitu".

En palabres de la presidenta de la Xunta de Personal Docente non Universitariu y representante de SUATEA, Beatriz Quirós, a falta de los datos definitivos del seguimientu, la fuelga puede consideráse un "éxitu", a pesar de convocase y organizase hai pocos díes. Quirós alvirtió que nel casu de que l'alministración asturiana siga ensin negociar colos sindicatos, tan dispuestos a convocar otra fuelga na enseñanza en pasando les vacaciones de Selmana Santa.

Dende la Xunta de Personal Docente aseguróse "que los servicios mínimos tan cumpliéndose, anque son abusivos" y que n'algunos "colexos agrupaos y d'educación especial algamen casi al cien por cien de la plantiya".

Finalmente los sindicatos convocantes fixeron un llamáu a la participación na manifestación convocada güei n'Uviéu a les 18.00 hores con salida na Estación de Renfe y llegada a la Conseyería de Educación.