El Centro Asturiano de Madrid falla los sos gallardones añales

Inaciu Galán y González va recibir n’agostu en Xixón mientres la FIDMA’l premiu añal na estaya de llingua asturiana qu’entrega’l Centro Asturiano de Madrid. Antonio Gamoneda, Jorge Suárez Carbajal y El Cencerru son dalgunos de los otros gallardonaos.

El centru qu’axunta a los asturianos residentes na capital castellana entamó estos gallardones nel añu 1967, anque nun sería hasta’l 1986 cuando creó la figura del ‘Urogallo de Bronce’ pa premiar a asturianos destacaos en delles estayes. Nesi primer añu, María Xosefa Canellada resultó la ganadora na de llingua asturiana, a la que siguieron n’ediciones posteriores Xosé Lluis García Arias, Jesús Neira, Llorienzu Novo Mier, Xosé Álvarez, Luis Aurelio Álvarez, Julián Burgos, Florina Alías, Roberto González-Quevedo, Lluis Xabel Álvarez ‘Texuca’, Ediciones Trabe, Albino Suárez, Mánfer de la Llera, Ramón d’Andrés, Nené Losada Rico, Academia de la Llingua Asturiana, Dolores Sánchez ‘La Galana’, Ana María Cano González, Pablo Xuan Manzano, Milio’l del Nido, Mª Esther García López, Berta Piñán, Xuan Bello, Mariluz Pontón y José Sariego, Miguel Solís Santos y Próspero Morán.

Nesta ocasión, la persona a la que quier reconocer el Centro Asturiano de Madrid ye a Inaciu Galán y González pol so llabor como escritor, periodista y presidente d’Iniciativa pol Asturianu. “Tovía nun puedo creelo”, señaló’l xixonés tres conocer la noticia, que dixo tar “mui contentu y al mesmu tiempu sorprendíu” al ser un premiu “al qu’ún nun se presenta, sinón que vien solu y suel dase a xente con trayectories muncho más dilataes”. “Esti premiu supon pa min un poco más de fuercia pa siguir col llabor pol idioma dende tolos ámbitos posibles; un puxu que nun ta nunca de más nun llabor nel que dacuando s’atopen munches dificultaes”, añadió.

Palmarés del añu 2012

El gallardón del añu 2012 más importante de los qu’entrega’l Centro Asturiano de Madrid, la ‘Manzana de Oro’, foi pa'l poeta uviedín Antonio Gamoneda, mentes que’l gallardón de ‘Asturianu Universal’ foi pa Luis Fernández Vega-Sanz. Los ‘Urogallos de Bronce’ nesta ocasión repartiéronse de la manera siguiente: Luis Montoto (Artesanía), Escuela de Baille Tradicional de Fitoria (Baille), Bibiana Sánchez García (Tonada), Grupu Coral San Pedro (Corales), Jorge Suárez Carbajal (Gaita), La Chalana (Gastronomía), Grupo de Montaña y Senderismo La Chiruca (Defensa de la Naturaleza), Fiesta del Asturcón (Festexos) y Albero Suárez Laso (Deporte).

Tamién reciben una mención especial l’Asociación pola Recuperación de Los Sidros y Les Comedies El Cencerru y la Cofradía del Oriciu, amás d’Olvido García Valdés, nesti casu con mención honorífica. Completen la rellación de gallardonaos Armando Fernández Suárez, sociu dende 1953 que caltién el númberu 30, como ‘Socio del año 2010’. Los premios van entregase en Xixón nel mes d’agostu nel trescursu de la Feria Internacional de Muestres d’Asturies (FIDMA).