La Confederación Hidrográfica abre espediente sancionador a Maderas Siero pol valtu d'árboles en Tiroco

La denuncia presentada pola Coordinadora Ecoloxista énte la Confederación Hidrográfica del Cantábricu pol valtu d’árboles en Tiroco llevó al organismu a abrir un espediente sancionador a Maderas Siero. El fechu tuvo llugar en setiembre.

La Comisaría d’Agües del organismu comprobó que’l valtu denunciáu polos ecoloxistes na marxe izquierda del regueru de La Peñuca, en Tiroco (Siero), al nun tener permisu pa ello la empresa con sede n’Argüelles. La Coordinadora Ecoloxista d'Asturies tamién tresmitió los fechos énte’l Gobiernu, pero nun tien constancia de que la Direición Xeneral de Montes procediera a aniciar  un espediente sancionador a Maderas Siero. El valtu, según aseguren los ecoloxistes, tamién afeutó a vexetación arbórea del monte, ensin que la maderera procediera a llimpiar los restos d’esta aición selmanes depués del so proceder. Amás, comprobaron qu’había manches d’aceite, procedente de la maquinaria utilizada, nos calces del llugar que desemboquen nel ríu Nora.

“Requerimos al Gobiernu del Principáu, a la Confederación Hidrográfica y al restu d’Alministraciones Públiques qu’estremen la vixilancia y cumplan cola obligación inspeutora y sancionadora encomendada pa evitar que les empreses madereres como la denunciada sigan prauticando impunemente los valtos masivos ensin atenese a les condiciones de les autorizaciones, inclusive ensin contar cola posesión de les mesmes, col impautu qu’ello supón y la perda de diversidá de paraxes como l’afeutáu, que, hasta’l momentu de los fechos denunciaos, gozaba d’un valor natural altu”, señala la Coordinadora.