El VI Concursu de Semeyes de la revista La Sidra viaxó pa Madrid

Miguel Ángel Puente Cabrero resultó ganador del VI Concursu de Semeyes La Sidra que se falló’l mes pasáu. La so obra ‘Cartel’ foi la meyor pal xuráu d’ente les 593 semeyes presentaes polos 134 fotógrafos participantes.

D’esta forma, el primer premiu d’esti concursu de repercusión internacional torna a viaxar fuera de les llendes del país –l’añu pasáu’l ganador foi l’inglés Bill Bradshaw–. La Comunidad de Madrid, territoriu qu’aporta’l mayor númberu de participantes xunto con Asturies y Euskadi, foi’l destín de la sesta edición del concursu gracies a la semeya ‘Cartel’, nel que se pue ver, en blanco y prietu, un cartelu cola pallabra ‘Sidras’. El xuráu que se decidió por esti trabayu, pol que so autor, Puente, recibe 500 euros en metálico y 100 en llibros, tuvo conformáu por Jose Simal, xefe de Fotografía d’El Comercio;  Ángel Gonzalez, fotógrafu de La Nueva España; Jose Angel Ornia, fotógrafu de productu y publicidá y gran aficionáu al mundu de la sidra; y Lorena Ayala, fotógrafa d’estudiu. Estos profesionales del mundu de la fotografía aconceyaron en Cabueñes, nel Llagar El Mancu.

El segundu puestu foi pal xixonés Jesús González García de Marina, por ‘Materia Prima’, que se llevó 300 euros en metálico y 50 en llibros. Mentes, tuvo que conformase cola tercer posición el tamién xixonés Óscar Chamorro Flórez por ‘Inmersión’ (125 euros en metálico y 25 en llibros), anque pudo disfrutar del Premiu Especial JR a la meyor semeya rellacionada col llagar de L’Infanzón y los sos productos por ‘Escanciado’. Esti gallardón tien como premiu dos caxes de sidra.

Hai que destacar que nesta edición del Concursu de Semeyes La Sidra participaron 134 fotógrafos de 18 naciones estremaes, con representación per primer vegada d’Australia. Les meyores fotografíes del concursu van poder vese nuna esposición que s’inaugurará a lo llargo d’esti mes na sidrería xixonesa La Galana.