El plazu pa presentar candidatures a la edición del 2013 del Premiu al Meyor Cantar fina’l 19 de xineru

El Premiu al Meyor Cantar, que tien como recompensa una plaza nel Liet International, yá tien abiertu’l plazu pa la presentación de candidatures. El 19 de xineru ye’l día caberu pa formalizar la participación na sétima edición del mesmu.

Esti gallardón busca "consolidar, arriquecer y prestixar la llingua y la cultura asturianes, na creencia, amás, de qu’actuaciones como ésta contribúin de forma eficaz a dinamizar l’actividad cultural de la comunidad autónoma y, sobre manera, un aspeutu tan importante de la mesma como ye’l de la creación musical", según apunten dende’l Gobiernu. Al concursu pueden presentase los músicos, a títulu individual o dientro de grupos, que comercializaran dalgún cantar orixinal de cualquier xéneru a lo llargo del añu 2012, quedando escluyíes les pieces tradicionales yá esistentes, les versiones o adaptaciones d’obres de creación espublizaes orixinalmente n’otra llingua, y les canciones que nun foron editaes y grabaes per vez vegada nel periodu referíu.

Les solicitúes serán evaluaes por un xuráu que será nomáu por resolución de la conseyera d’Educación, Cultura y Deporte, Ana González, y que tará formáu por un máximu de nueve y un mínimu de cinco persones venceyaes col ámbitu de la música asturiana. La seleición tendrá una primer fase que consistirá nun corte nel que los miembros del xuráu puntuarán a caún de los concursantes que s’axusten a lo estipuláu nes bases; los cantares, nun númberu non inferior a cinco, qu’obtengan la puntuación global más alta, serán consideraes finalistes. Na segunda fase escoyeráse al ganador d’ente la rellación de finalistes. Pa ello, los músicos han d’actuar en direuto na gala del 'Premiu al Meyor Cantar' defendiendo’l tema seleicionáu. Tres les actuaciones, fadráse públicu’l fallu del xuráu. La gala celebráse en febrero, nuna fecha por confirmar cercana al 21, Día Internacional de la Llingua Materna.

L’intérprete o grupu ganador va recibir como gallardón una escultura orixinal y esclusiva d’un artista asturianu de prestixu. Amás, el Gobiernu trabayará na promoción y difusión del cantar nos medios de comunicación y nos eventos entamaos o promovíos pola institución. D’igual forma, el vencedor del concursu va representar de manera oficial al país nel Liet Internacional, que nesta ocasión, si nun hai novedá, va celebrase en Còrsica. Por esta participación nun recibirá nenguna cantidá en conceptu de caché, ensin perxuiciu de que, nel so casu, sía la Direición Xeneral de Política Llingüística, o otra entidá cola que se llegara a un alcuerdu, la qu’abone los gastos derivaos de tresporte, allugamientu y comida.