L’Aguañaz presenta trés novedaes discográfiques de dellos estilos

Los discos últimos de Soncai System, Mariluz Cristóbal y Toli Morilla son les trés novedaes pa esti iviernu de L’Aguañaz, sellu integráu anguaño en Goxe Producciones. Trés estilos diferentes con un denominador común: l’usu del asturianu.

Seis años depués de ‘Clashturies’, Xune Elipe y Sergio Rodríguez recuperen el proyeutu Soncai System pa la edición de ‘Revolusón’, discu que caltién l’espíritu anterior anque con más electrónica y ritmos más llatinos y baillables. En conclusión, una “mecigaya axeitada d’estilos y soníos mui abierta y heteroxénea, onde tán presentes ritmos electrónicos, ska, reggae, funk, hip-hop, latin-jazz…, nuna mezclienda que bien podría llevar l’axetivu de mestiza, incorporando la llingua asturiana a un contestu musical non mui avezáu”, señalen dende L’Aguañaz. Pa esti trabayu, d’estudiu dafechu, collaboren músicos asturianos como Vito Álvarez, Aique García, Delfín Valdés, Miguel Herrero, Fran Carrio, Eladio Díaz, Fabián Zapico o Jacobo de Miguel, ente otros. Tolos cantares son creaciones propies, a esceición d’una versión n’asturianu del clásicu ‘A message to you Rudy’, de The Specials.

Un añu más que Soncai System llevaba Mariluz Cristóbal Caunedo ensin sacar discu. La cantante referente de la canción asturiana presenta ‘Cancios y asturianaes’, el so tercer álbum d’estudiu, discu que presenta un repertoriu variáu onde entren “tonaes, cantares, añaes o villancicos, con pieces axeitaes pa les sos característiques vocales y estilu, que van de la cenciellez a la complexidá instrumental, col aquello de mostrar les posibilidaes d’esti xéneru y siempre buscando una contemporaneidá que nun resulte forzada o artificial”. Según espliquen dende la discográfica, el procesu de grabación “foi bien llaboriosu, al tener qu’adaptar un cantu llibre como la tonada a unes estructures rítmiques que precisen d’un tiempu determináu y una interacción ente los instrumentos y la voz”.

En ‘Cancios y asturianaes’ collaboren nomes bien conocíos del panorama musical del país, como Rubén Bada, Sergio Rodríguez, Pepín de Muñalén, Lisardo Prieto, Dolfu R. Fernández, Borja Baragaño y Elías García. Hai que destacar que Cristóbal trabayó con testos procedentes del llibru de Llorienzu Novo Mier que da nome al discu, espublizáu nel 1980 y reeditáu esti mesmu añu. “Nél l’autor compón una serie de versos pensaos precisamente pa ser cantaos como lletres de tonada. Dalgunos d’ellos yá tán musicaos y mesmamente convertíos en pieces mui conocíes del repertoriu del xéneru, pero otros tovía nun foron interpretaos por nadie. Nesti sen, el discu axunta estes dos vertientes y conviértese nuna obra monográfica”, espliquen dende L’Aguañaz.

15 años recopilaos nun discu

Esti 2012 Toli Morilla cumple 15 años de carrera y el cantautor quixo aprovechar esta celebración pa facer una revisión a la trayeutoria. Asina naz ‘Estándar & Probes. 15 Años de Folk,  Rock y Poesía n’Asturianu’, trabayu que se presentó al públicu’l 29 de payares nel Café Trisquel. Según esplica’l propiu Morilla, esti trabayu tien dos cares, “A y B, anque físicamente nun esista nada más qu’una. Esto ye asina pola diferencia qu’hai ente les 18 grabaciones qu’aparecen nesta edición”. La primer d’elles, l’A, son nueve cantares grabaos n’acústicu, xunto con Ángel Miguel, nos TUTU Estudios de Sergio Rodríguez. “Ye lo más asemeyao a un conciertu en vivo”, añade Morilla, qu’espera qu’esta parte sirva tamién como carta de presentación pa unviar a festivales, teatros, sales y programadores de conciertos, y asina “poder facer lo que más nos presta: tocar”. Nesta parte, inclúinse instrumentos como guitarres, mandolines, dobro y harmóniques. Mentes, la segunda parte, la B, “son nelles mesmes nueve cares B, una esbilla d’esos cantares que quedaron perdíos pelos discos ensin volvese a tocar enxamás”, apunta Morilla, qu’añade que “quixi rescatalos de la mugre’l tiempu y da-yos otra oportunidá”.

“Son éstes trés producciones qu’amuesen la vitalidá de la música fecha en llingua asturiana, con propuestes mui distintes ente sí, pero xuníes pola calidá y el bon facer de los sos protagonistes”, afirmen dende L’Aguañaz.