El Gobiernu sacará esti vienres alantre’l presupuestu pal añu 2013

Esti vienres va tener llugar na Xunta Xeneral el Plenu d’alderique de les enmiendes parciales a los Presupuestos Xenerales d’Asturies presentaes pola oposición. El Gobiernu sacará alantre les cuentes del 2013 col sofitu d’IX y UPyD.

La Cámara asturiana analizará, a partir de les 9 hores, les 134 enmiendes presentaes en total polos grupos parllamentarios a los presupuestos, asina como les 14 rexistraes por Foro de Ciudadano (6) y Partido Popular (8) al proyeuto de Llei de Midíes Urxentes. La selmana pasada yá se refugaren les enmiendes a la totalidá d’estes dos formaciones polítiques. D’esti mou, la previsión ye que les cuentes nacionales pal 2013 queden aprobaes de manera definitiva esti vienres, yá que los trés grupos qu’alcordaron el proyeuto presupuestariu, PSOE (17 diputaos), IX (5) y UPyD (1), sumen la mayoría suficiente pa sacales alantre.

Los Presupuestos d’Asturies pa l’añu que vien ascienden a 3.808 millones de euros –un 1 por cientu menor respeuto al axuste d’agostu–, de los que 2.565 millones destinaránse a gastu social –un 67 por cientu del total–. La inversión llevaráse 364 millones d’euros. Nesti momentu, Asturies ta xestionada con unos presupuestos prorrogaos de les cuentes del 2011. Naquella ocasión, l'Executivu de signu socialista sacó alantre un proyeutu qu’ascendió a 4.133 millones, de los que 1.070 millones destináronse a inversión. En xineru del 2012, el Gobiernu de Francisco Álvarez-Cascos (Foro Asturias Ciudadano) vio como la cámara asturiana refugaba'l so proyeutu, que fixaba'l techu de gastu en 4.208 millones. Ésti foi’l motivu principal que lu llevó a convocar eleiciones anticipaes, ganaes pol PSOE.

Otra manera, a lo llargo de la sesión plenaria procederáse a la renovación de la Sindicatura de Cuentes. Los candidatos propuestos polos grupos parllamentarios del PSOE, Foro y IX son Avelino Viejo, Miguel Ángel Menéndez García y Antonio Arias, de manera respeutiva. PP y UPyD optaron por nun presentar candidatura al muérganu de control esternu.