Gonzali Producciones trabaya nel doblaxe del clásicu ‘Charade’

Cary Grant y Audrey Hepburn van falar n’asturianu en ‘Charada’, la versión na nuesa llingua del clásicu ‘Charade’ (1963) de Stanley Donen. L’equipu de doblaxe de Gonzali Producciones principió a trabayar nel estudiu’l vienres.

‘Charada’ tratáse d’una película estauxunidense perconocida qu’amesta rasgos de thriller colos de comedia romántica: Regina, tres unes vacaciones nuna estación d’esquí, onde conoz a un home encantador, torna a París cola decisión de divorciase del so maríu, pero cuando llega a la capital del Estáu francés la Policía informa-y que lu asesinaron. Trés son los homes sospechosos de matar al maríu de Regina en busca d’una fortuna que, en teoría, taría en manes del difuntu pero que, en realidá, pertenez al Gobiernu de los Estaos Xuníos.

Una historia que va poder sentise n’asturianu gracies al llabor de Gonzali Producciones, que yá fixo enantes la torna al nueso idioma d’otros llargometraxes como ‘Los viaxes de Gulliver (2010), ‘El tercer home’ (2011), ‘McLintock’ (2011), ‘Popeye y les 1001 nueches’ (2011) –ésta con versión tamién en gallego-asturiano– y ‘La nueche de los muertos vivientes’ (2012). Precisamente una d’esta cintes, el western ‘McLintock’, va poder vese mañana pela canal Teleasturias, disponible pel TDT y per Internet, a les 15 hores –nun primer momentu taba anunciáu pa les 17 hores–. Ensin dulda una bona opción cola que compartir la tarde de mañana cola familia en Navidá.